ଯାଜପୁର: ଘୁଞ୍ଚିଲା ରୂପେଶ ଭଦ୍ର ଜାମିନ ଆବେଦନର ଶୁଣାଣି । ନଭେମ୍ବର 29 ତାରିଖରେ ଯାଜପୁର ଜିଲ୍ଲା ଦୌରାଜଜ କୋର୍ଟରେ ଆବେଦନ ଉପରେ ଶୁଣାଣି ହେବ । ହରିଦାସପୁର ପିଇଓ ସ୍ମିତାରାଣୀ ବିଶ୍ବାଳଙ୍କ ମୃତ୍ୟୁ ଘଟଣାର ଅଭିଯୁକ୍ତ ରୂପେଶ ଭଦ୍ର ।
ରୂପେଶ ଭଦ୍ରଙ୍କ ଜାମିନ ଆବେଦନକୁ ଆସନ୍ତା 29 ତାରିଖକୁ ଘୁଞ୍ଚାଇଛନ୍ତି ଯାଜପୁର ଜିଲ୍ଲା ଦୌରାଜଜ । ଆଜିର ଶୁଣାଣିରେ ରୂପେଶଙ୍କ ବିରୋଧରେ ଧର୍ମଶାଳା ପୋଲିସ ପାଖାପାଖି 2000 ପୃଷ୍ଠାର ଦସ୍ତାବିଜ କୋର୍ଟରେ ଦାଖଲ କରିଛି । ହେଲେ ସମୟ ଅଭାବରୁ ଶୁଣାଣି ହୋଇ ନପାରି ଆସନ୍ତା 29 ତାରିଖରେ ହେବ ବୋଲି ଜଣାପଡିଛି ।
ଅକ୍ଟୋବର 16 ତାରିଖ ଦିନ ଧର୍ମଶାଳା ବ୍ଳକ ହରିଦାସପୁର ପଞ୍ଚାୟତର ପିଇଓ ସ୍ମିତାରାଣୀ ବିଶ୍ବାଳଙ୍କ ମୃତଦେହ ରୂପେଶଙ୍କ ଗେଷ୍ଟ ହାଉସରୁ ଉଦ୍ଧାର କରାଯାଇଥିଲା । ଏହା ଏକ ଆତ୍ମହତ୍ୟା ଓ ଏଥିପାଇଁ ରୂପେଶ ଦାୟୀ ବୋଲି ଅଭିଯୋଗ କରି ପୋଲିସ ତାଙ୍କୁ କୋର୍ଟ ଚାଲାଣ କରିଥିଲା । ତେବେ ଜାମିନ ପାଇଁ ପ୍ରଥମେ ଚଣ୍ଡିଖୋଲ ଏସଡିଜେଏମ ଓ ପରେ ଯାଜପୁର ଜିଲ୍ଲା ଦୌରାଜଜଙ୍କ ନିକଟରେ ରୂପେଶ ଆବେଦନ କରିଛନ୍ତି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
