ଯାଜପୁର : ଧର୍ମଶାଳା ଥାନା ଅନ୍ତର୍ଗତ ଦେଉଳି ପାହାଡ ଉପରୁ ମିଳିଛି ମହିଳାଙ୍କ ମୃତଦେହ । ଘଟଣାସ୍ଥଳରୁ ଜଣେ ନାବାଳିକାକୁ ମଧ୍ୟ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି ।
ମୃତ ମହିଳାଙ୍କୁ ହତ୍ୟା କରାଯାଇଥବା ଅଭିଯୋଗ ହୋଇଛି । ତାଙ୍କ ନାମ ମିଟୁଆ ସାମଲ ବୋଲି ଜଣାପଡିଛି । ସ୍ଥାନୀୟ ଅଞ୍ଚଳର ବାବନ ନାମକ ଜଣେ ଯୁବକ ଏପରି କାଣ୍ଡ ଘଟାଇ ଫେରାର ହୋଇଯାଇଥିବା ଅଭିଯୋଗ ହୋଇଛି ।
ସୂଚନା ମୁତାବକ, ସମ୍ପୃକ୍ତ ଯୁବକଙ୍କର ନାବାଳିକା ଝିଅ ସହ ପ୍ରେମ ସମ୍ପର୍କ ଥିଲା । ନାବାଳିକାର ପରିବାର ଲୋକେ ଏହାକୁ ବିରୋଧ କରିଆସୁଥିଲେ । ନାବାଳିକା ସହ ଯୁବକ ଜଣକ ଶାରୀରିକ ସମ୍ପର୍କ ରଖିଥିବା ନେଇ ପୂର୍ବରୁ ଥାନାରେ ଅଭିଯୋଗ କରିଥିଲେ ପରିବାର ଲୋକେ । ଏହି ଘଟଣାରେ ପ୍ରତିଶୋଧ ପରାୟଣ ହୋଇ ଯୁବକ ଓ ତାର ଅନ୍ୟ ଜଣେ ସହଯୋଗୀ ଉଭୟ ମାଆ ଓ ଝିଅଙ୍କୁ ଦେଉଳି ପାହାଡ ଉପରକୁ ଉଠାଇନେଇ ମରଣାନ୍ତକ ଆକ୍ରମଣ କରିଥିଲେ । ଘଟଣାସ୍ଥଳରେ ହିଁ ମହିଳାଙ୍କ ମୃତ୍ୟୁ ଘଟିଥିବା ବେଳେ ନାବାଳିକାକୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ କଟକ ମେଡିକାଲରେ ଭର୍ତ୍ତି କରାଯାଇଛି ।
ତେବେ ଅଭିଯୋଗକୁ ଭିତ୍ତି କରି ଧର୍ମଶାଳା ପୋଲିସ ଏକ ହତ୍ୟା ମାମଲା ରୁଜୁ କରିବା ସହ ଘଟଣାର ତଦନ୍ତ ଜାରି ରଖିଛି । ଅନ୍ଯପଟେ ସହଦେବ ଖୁଣ୍ଟା ଥାନା ଅଞ୍ଚଳରେ ରହୁଥିବା ମୃତା ମହିଳାଙ୍କ ପୁଅର ମଧ୍ୟ ସେହି ଏକାଦିନରେ ମୃତ୍ୟୁ ଘଟିଥିବା ଜଣାପଡିଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
