ଯାଜପୁର: କୁଆଖିଆ ଥାନା ହରିପୁର ବଜାରରୁ ଦିନ ଦ୍ବିପ୍ରହରରେ ସୁନା ଅଳଙ୍କାର ଲୁଟ ଘଟଣା। ଘଟଣାରେ କୁଆଖିଆ ପୋଲିସ ୩ ଜଣ ଲୁଟେରାକୁ ଗିରଫ କରିବାରେ ସକ୍ଷମ ହୋଇଛି। ଗିରଫ ଅଭିଯୁକ୍ତମାନେ ହେଲେ ଯାଜପୁର ଜିଲ୍ଲା ଜଖପୁରା ଥାନା ଦଶମାଣିଆ ଗ୍ରାମର ରଙ୍ଗା ପ୍ରଧାନ, ଆକାଶ ପ୍ରଧାନ ଓ ବିଜୟ ପ୍ରଧାନ।
ଅଭିଯୁକ୍ତଙ୍କୁ ଗିରଫ କରିବା ସହ ଲୁଟ ହୋଇଥିବା ସୁନା ଅଳଙ୍କାରକୁ ମଧ୍ୟ ଜବତ କରିଛି ପୋଲିସ । ଏହାସହ ସେମାନଙ୍କ ନିକଟରୁ ଏକ ବାଇକ ଜବତ ହୋଇଛି । ସୂଚନା ମୁତାବକ, ବୁଧବାର ଅପରାହ୍ନରେ ରାଜେନ୍ଦ୍ରପୁର ଅଞ୍ଚଳର ରବିନ୍ଦ୍ର ବେହେରାଙ୍କ ଠାରୁ ଲକ୍ଷାଧିକ ଟଙ୍କାର ସୁନା ଅଳଙ୍କାର ଲୁଟ ହୋଇଥିବା ଅଭିଯୋଗ ହୋଇଥିଲା ।
ହରିପୁର ବଜାରରୁ ଅଳଙ୍କାର କିଣି ନିଜ ବାଇକରେ ରଖି ଅନ୍ୟ ଜିନିଷ କିଣିବା ପାଇଁ ପାଖ ଦୋକାନକୁ ଯାଇଥିଲେ ରବିନ୍ଦ୍ର। ଏହି ସମୟରେ ଦୁର୍ବୃତ୍ତମାନେ ବାଇକରେ ଥିବା ସୁନା ଅଳଙ୍କାରକୁ ଲୁଟି ନେଇ ଫେରାର ହୋଇଯାଇଥିଲେ । ଅଭିଯୋଗ ପରେ ପୋଲିସ ଦୋକାନରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରିବା ସହ ତଦନ୍ତ ଚଳାଇଥିଲା । ତେବେ ଆଜି ଏହି ଘଟଣାରେ ସଂପୃକ୍ତ ଥିବା ୩ ଲୁଟେରାକୁ ଗିରଫ କରି କୋର୍ଟ ଚାଲାଣ କରିଥିବା ଯାଜପୁର ରୋଡ଼ ଏସଡିପିଓ ଚିନ୍ମୟ କୁମାର ନାୟକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
