ଯାଜପୁର: ଜିଲ୍ଲାର ବ୍ୟାସ ସରୋବରର ସୌନ୍ଦର୍ଯ୍ୟକରଣ କାମ ବେଆଇନ ଭାବେ ନିର୍ମାଣ କାମ କରାଯାଉଛି । ଏହାର ନିର୍ମାଣକାମ ତୁରନ୍ତ ବନ୍ଦ କରାଯାଉ । ଏନେଇ ଯାଜପୁର ଜିଲ୍ଲାପାଳ ଓ କଟକ ଡିଏଫ୍ଓଙ୍କୁ ନିର୍ଦ୍ଦେଶ ଦେଇଛନ୍ତି ଏନଜିଟି (National Green Tribunal) ।
ସୂଚନା ଅନୁସାରେ, ଯାଜପୁର ଜିଲ୍ଲାର ୧୧୦ ଏକର ଜମିରେ ବ୍ୟାସ ସରୋବରର ସୌନ୍ଦର୍ଯ୍ୟକରଣ ପାଇଁ ନିର୍ମାଣ କାର୍ଯ୍ୟ ହେଉଛି । ଏଥିମଧ୍ୟରେ ୩୩ ଏକର ଜମି ଜଙ୍ଗଲ କିସମର ଜମି ରହିଛି । ତେବେ ଜଙ୍ଗଲ ଜମିରେ କଙ୍କ୍ରିଟ କାମ ହୋଇପାରିବ ନାହିଁ ବୋଲି ନିୟମ ରହିଛି । ଏପରିକି ଏହି ନିର୍ମାଣ କାମ ପାଇଁ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଅନୁମତି ମଧ୍ୟ ମିଳିନାହିଁ । ଏହାସତ୍ତ୍ବେ ଚାଲିଛି ନିର୍ମାଣ କାମ । ଫଳରେ ଏହି ନିୟମକୁ ଏଠାରେ ଖୋଲାଖୋଲି ଉଲ୍ଲଘଂନ କରାଯାଇଛି । ସେହିପରି ୧୧୦ ଏକର ଜମି ମଧ୍ୟରେ ଜଙ୍ଗଲ ଜମି ସହିତ ପାଟ କିସମର ଜମି ମଧ୍ୟ ରହିଛି । ଯାହାକି ୱେଟଲ୍ୟାଣ୍ଡ ମ୍ୟାନେଜମେଣ୍ଟ ନିୟମ ଅନୁସାରେ ଏହି ପାଟ କିସମର ଜମିରେ ମଧ୍ୟ ବିନା ଅନୁମତିରେ କୌଣସି ପ୍ରକାରର ନିର୍ମାଣ କାମ ହେବା ଅନୁଚିତ ।
ବ୍ୟାସ ସରୋବରର ସୌନ୍ଦର୍ଯ୍ୟକରଣ କାମ କରାଯିବା ବେଳେ ପରିବେଶ ସୁରକ୍ଷା ଉପରେ ଦୃଷ୍ଟି ଦିଆଯାଇନାହିଁ ବୋଲି ଅଭିଯୋଗ କରିଛନ୍ତି ଦିଲୀପ କୁମାର ସାମନ୍ତରାୟ ନାମକ ଜଣେ ବ୍ୟକ୍ତି । ଏନେଇ ଅଭିଯୋଗକାରୀଙ୍କ ପକ୍ଷରୁ ତାଙ୍କ ଓକିଲ ଶଙ୍କର ପ୍ରସାଦ ପାଣି ଏନଜିଟିରେ ତଥ୍ୟ ଉପସ୍ଥାପନ କରିଥିଲେ । ଆବେଦନକାରୀ ଅଗଷ୍ଟ ୨୫ ତାରିଖରେ ଦାଖଲ କରିଥିବା ସତ୍ୟପାଠରେ ମୁଣ୍ଡାମାଲ ଗ୍ରାମସଭାରେ ଗତ ଜାନୁଆରୀ ୨୮ତାରିଖରେ ହୋଇଥିବା ସଙ୍କଳ୍ପ ଦାଖଲ କରିଥିଲେ । ଏହି ଗ୍ରାମସଭା ବୈଠକରେ ବ୍ୟାସନଗର ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ ଅଧ୍ୟକ୍ଷତା କରିଥିଲେ । ଏଥିରେ ଏନଜିଟି ଆଶ୍ଚର୍ଯ୍ୟ ପ୍ରକାଶ କରିବା ସହ ବ୍ୟାସନଗର ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ କିପରି ଗ୍ରାମସଭା ବୈଠକରେ ଅଧ୍ୟକ୍ଷତା କରିଥିଲେ ବୋଲି ପ୍ରଶ୍ନ କରିଛନ୍ତି । ସେହିପରି ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ ମୁଣ୍ଡାମାଲ ଗ୍ରାମର ବାସିନ୍ଦା କି ବୋଲି ପ୍ରଶ୍ନ କରିଛନ୍ତି ।
ଏହା ବି ପଢନ୍ତୁ- ନିଖୋଜର ୨ବର୍ଷ ପରେ ପିହୁ ପାଇଁ ଲାଗିଲା ପୋଷ୍ଟର, ପରିବାରର CBI ତଦନ୍ତ ଦାବି
ପରବର୍ତ୍ତୀ ଶୁଣାଣି ଯାଏଁ କାମ ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି ଏନଜିଟି (National Green Tribunal) । ଏହି ମାମଲାରେ ୪ ସପ୍ତାହ ମଧ୍ୟରେ ଜବାବ ରଖିବା ପାଇଁ ଯାଜପୁର ଜିଲ୍ଲାପାଳ, କଟକ ଡିଏଫଓ, ରାଜ୍ୟ ଜଙ୍ଗଲ ଓ ପରିବେଶ ବିଭାଗ, ସେଣ୍ଟ୍ରାଲ ପଲ୍ୟୁସନ କଣ୍ଟ୍ରୋଲ ବୋର୍ଡ, ଜଙ୍ଗଲ ଓ ପରିବେଶ ମନ୍ତ୍ରାଳୟ, ଷ୍ଟେଟ ଏନଭାରମେଣ୍ଟ ଇମ୍ପାକ୍ଟ ଆସେସମେଣ୍ଟ ଅଥରିଟିଙ୍କୁ ନିର୍ଦ୍ଦେଶ ଦେଇଛନ୍ତି ଏନଜିଟି । ଏହି ମାମଲାର ପରବର୍ତ୍ତୀ ଶୁଣାଣି ଆସନ୍ତା ଅକ୍ଟୋବର ୧୪ରେ ହେବା ନେଇ ସ୍ଥିର ହୋଇଛି । ଏହା ପୂର୍ବରୁ ନିର୍ଦ୍ଧାରିତ ସମୟ ସୀମା ମଧ୍ୟରେ ସମସ୍ତ ବିଭାଗ ପକ୍ଷରୁ ସତ୍ୟପାଠ ଜରିଆରେ ଜବାବ ରଖିବାକୁ ଏନଜିଟି ନିର୍ଦ୍ଦେଶ ଦେଇଛନ୍ତି ।
ଇଟିଭି ଭାରତ, ଯାଜପୁର
