ଯାଜପୁର: ଜିଲ୍ଲା କୋରେଇ ବ୍ଲକ ଅନ୍ତର୍ଗତ ହଳଦି ଗଡିଆ ଗ୍ରାମରେ ଭୟାବହ ଅଗ୍ନିକାଣ୍ଡ । ଅଗ୍ନିକାଣ୍ଡରେ ଜଣେ ବିଧବାଙ୍କ ଦୁଇ ବଖରା ଘର ଭସ୍ମୀଭୂତ । ହଳଦି ଗଡିଆ ଗ୍ରାମର ସ୍ବର୍ଗତ କଳ୍ପତରୁ ନାଥଙ୍କ ଘରେ ଏହି ନିଆଁ ଲାଗିଥିଲା ଜଣାପଡିଛି । ଘରର ସମସ୍ତ ଆସବାବପତ୍ର ପୋଡି ଜଳି ପାଉଁଶ ହୋଇଯାଇଛି । ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି ।
ସୂଚନା ମୁତାବକ, ସ୍ବର୍ଗତ କଳ୍ପତରୁ ନାଥଙ୍କ ପତ୍ନୀ ସସ୍ମିତା ନାଥ ୬୦୭ ନମ୍ୱର୍ ପ୍ଲଟରେ ଚାଳ ଛପର ଘର ଖଣ୍ଡେ କରି ରହୁଥିଲେ । ଅସହାୟ ବିଧବା ମହିଳା ଜଣକ ବହୁତ୍ ଅସୁବିଧାରେ ଚଳୁଥିଲେ । ଶନିବାର ବିଳମ୍ବିତ ରାତିରେ କୌଣସି କାରଣରୁ ହଠାତ୍ ତାଙ୍କ ଘରେ ନିଆଁ ଲାଗିଯାଇଥିଲା । ରାତି ପ୍ରାୟ ୩ ଘଟିକା ସମୟରେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ ମଧ୍ୟ ସବୁ ଆସବାବପତ୍ର ପୋଡି ଯାଇଛି । ତୁଲତି ସର୍କଲ ଆରଆଇ ସୁଜିତ୍ କୁମାର ସାମଲ, ଅବସରପ୍ରାପ୍ତ ଆରଆଇ ରଘୁନାଥ ମହାନ୍ତି ଘଟଣାର ତଦନ୍ତ କରି ଆନୁଷଙ୍ଗିକ ବ୍ୟବସ୍ଥା ଗ୍ରହଣ କରିବା ପାଇଁ ପ୍ରତିଶ୍ରୁତି ଦେଇଛନ୍ତି ।
ମହିଳାଙ୍କ ଏକ ସାତ ବର୍ଷର ଛୋଟ ପୁଅଟିଏ ଅଛି । ଏଣୁ ଏହି ଗରିବ ପରିବାରକୁ ସରକାରୀ ସହାୟତା ଯୋଗାଇ ଦେବା ପାଇଁ ଗ୍ରାମବାସୀମାନେ ନିବେଦନ କରିଛନ୍ତି । ସେପଟେ ସ୍ଥାନୀୟ ସରପଞ୍ଚ ମଧ୍ୟ ଘଟଣାସ୍ଥଳରେ ପହଞ୍ଚି ସୁବିଧା ସୁଯୋଗ ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
