ଯାଜପୁର: ଆଜି ପବିତ୍ର କୁମାର ପୂର୍ଣ୍ଣିମା । କୁମାରୀ ମାନଙ୍କର ଏହା ହେଉଛି ବଡପର୍ବ । ଆଜି ସକାଳୁ ସକାଳୁ ଯାଜପୁର ଜିଲ୍ଲାର ସଦାନନ୍ଦପୁର ଗ୍ରାମର କୁମାରୀ ମାନେ ନୂତନ ବସ୍ତ୍ର ପରିଧାନ କରି ଗୁଆ, ନଡିଆ, ଖଇରେ ସୂର୍ଯ୍ୟଙ୍କୁ ଆଜୁଁଳା ଟେକିବା ସହ ତୁଳସୀ ଚଉରାମୂଳେ ପୂଜା କରିଥିଲେ । ଏହାସହ ସଂଧ୍ୟାରେ ମଧ୍ୟ ଚାନ୍ଦ ପୂଜା କରିଛନ୍ତି । କୁମାର ପୂର୍ଣ୍ଣିମା ପାଇଁ ସଦାନନ୍ଦପୁର ଚଳଚଞ୍ଚଳ ହୋଇପଡିଛି । ଗାଁର ସମସ୍ତ ବିବାହିତ ଓ ଅବିବାହିତ କୁଆଁରୀ ମାନେ ମିଳିତ ଭାବେ ଧୂମଧାମରେ କୁମାର ପୂର୍ଣ୍ଣିମା ପାଳନ କରୁଛନ୍ତି ।
ତେବେ ଏହି ଗ୍ରାମର ଏକ ବିଶେଷତ୍ବ ହେଲା କୋଠି ପୂଜା । ଯାହାକୁ ପାଳିବାକୁ କୁମାର ପୂର୍ଣ୍ଣିମାର 7ଦିନ ପୂର୍ବରୁ ପ୍ରସ୍ତୁତି ଆରମ୍ଭ ହୋଇଯାଇଥାଏ । କୁମାର ପୂର୍ଣ୍ଣିମାର ଠିକ ପୂର୍ବରାତ୍ରିରେ କୁମାରୀ ମାନେ ଗାଁର ଦାଣ୍ଡରେ ତିଆରି କରିଥାନ୍ତି ବିରାଟ ବିରାଟ କୋଠି । କୌଣସି ରଙ୍ଗରେ ନୁହେଁ କେବଳ କଇଁ ଫୁଲରେ ତିଆରି କରିଥାନ୍ତି ଏହି କୋଠି । ଯାହାକୁ କେହି ନିଜ ଆଖିରେ ନ ଦେଖିଲେ ବିଶ୍ବାସ କରିହେବ ନାହିଁ । ବର୍ଷ ବର୍ଷ ଧରି ଏହି କୋଠି ପୂଜା ପରମ୍ପରା ଚାଲିଆସୁଛି ଏହି ଗାଁରେ ।
ଯାଜପୁର ସଦାନନ୍ଦପୁର ଗାଁରେ ଏହି ପର୍ବ କିଛି ନିଆରା ଢ଼ଙ୍ଗରେ ପାଳିତ ହୋଇଥାଏ । କୁମାର ପୂର୍ଣ୍ଣିମା ପୂର୍ବ ରାତ୍ରିରେ ଗାଁ ଅଗଣାରେ କୁମାରୀ ମାନେ କଇଁ ଫୁଲରେ ତିଆରି କରନ୍ତି ବିଭିନ୍ନ ପ୍ରକାରର କୋଠି । ଏଭଳି କୋଠି ପୂଜା କଲେ କଇଁ ଫୁଲ ଓ ଚନ୍ଦ୍ରଙ୍କ ମଧ୍ୟରେ ଥିବା ପ୍ରେମ ଓ ଭଲପାଇବା ଭଳି କୁଆଁରୀଙ୍କୁ ଭଲ ସ୍ବାମୀ ମିଳେ ବୋଲି ବିଶ୍ବାସ ରହିଛି । ତେବେ ଆଧୁନିକତାର ଦ୍ବାହିରେ କୋଠିକୁ ଅଧିକ ସୁନ୍ଦର କରିବା ପାଇଁ ରଂଗୋଲିର ମଧ୍ୟ ବ୍ୟବହାର କରାଯାଉଛି ।
ସଦାନନ୍ଦୁପର ଗାଁରେ ଚାଲିଆସିଥିବା ଏହି କୋଠି ପୂଜା ପରମ୍ପରାକୁ ଗାଁର ସପନେଶ୍ବର ମହାନ୍ତି ଆରମ୍ଭ କରିଥିଲେ । କବି ସମ୍ରାଟ ଉପେନ୍ଦ୍ର ଭଞ୍ଜଙ୍କ ଦ୍ବାରା ଲିଖିତ ପୁସ୍ତକ “ଚିତ୍ରକାବ୍ୟ ବନ୍ଧୋଦ୍ବୟ”ରେ ଅଙ୍କା ଯାଇଥିବା ଏହି କୋଠିକୁ ସେ ଗାଁର ଅଗଣାରେ ଆଙ୍କିଥିଲେ । ଧିରେ ଧିରେ ଏହି କୋଠି ପରମ୍ପରା ଅନ୍ୟ ଗାଁକୁ ବ୍ୟାପିଛି । ଆଉ ଏକ ବିଶେଷତ୍ବ ହେଲା କୁମାର ପୂର୍ଣ୍ଣିମା ଦିନ ଗାଁର ଯୁବକ ମାନେ ପାଳଭୁତ ବେଶ ଧାରଣ କରି କୁମାରୀଙ୍କୁ ଡରାଇଥାନ୍ତି । ଯାହକୁ ଦେଖିବାକୁ ଗାଁରେ ପ୍ରବଳ ଭିଡ ହୋଇଥାଏ । ଏହାସହ ଚନ୍ଦ୍ରପୂଜା ପରେ ଗାଁର ସମସ୍ତ ଯୁବକ ଯୁବତୀ ମାନେ ନାଚଗୀତରେ ମସଗୁଲ ରୁହନ୍ତି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
