ଯାଜପୁର: କୁଆଖିଆ ଥାନା କୋରକରା ଅଞ୍ଚଳରେ ମଦ ଦୋକାନ ଭଙ୍ଗାରୁଜା ଘଟଣା । ଏଥିରେ ସମ୍ପୃକ୍ତ ୬ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି କୁଆଖିଆ ପୋଲିସ । ଏହି ଘଟଣାରେ ଗତକାଲି ୪ ଜଣ ଗିରଫ ହୋଇଥିବା ବେଳେ ଆଜି (ଶୁକ୍ରବାର) ଆଉ ୨ ଜଣଙ୍କୁ ଗିରଫ କରାଯାଇଛି ।
ଗାଁ ମହିଳାଙ୍କ ମଦ ଦୋକାନ ଭଙ୍ଗାରୁଜା ଘଟଣା, ୬ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ
ଗିରଫ ଅଭିଯୁକ୍ତମାନେ ହେଉଛନ୍ତି ସ୍ଥାନୀୟ ଆଦମପୁର ଗ୍ରାମର ଦିବାକର ନାୟକ, ଧୃବାନନ୍ଦ ନାୟକ, ଗିରିଧାରୀ ଖୀଲାର, ସଚିଦାନନ୍ଦ ସତପଥୀ, ଶୁଶାନ୍ତ ନାୟକ ଏବଂ ନଠୁଆବର ଗ୍ରାମର ମାନସ ମଲ୍ଲିକ।
ଗତ ୫ ତାରିଖ ଦିନ ସ୍ଥାନୀୟ ଅଞ୍ଚଳର ଶତାଧିକ ମହିଳା ଓ ପୁରୁଷ ମଦ ଦୋକାନ ଭଙ୍ଗାରୁଜା କରିବା ସହ ଲକ୍ଷାଧିକ ଟଙ୍କାର ମଦ ନଷ୍ଟ କରିଦେଇଥିଲେ । ଏନେଇ ମଦ ଦୋକାନ ମାଲିକଙ୍କ ପକ୍ଷରୁ କୁଆଖିଆ ଥାନାରେ ଲିଖିତ ଅଭିଯୋଗ ହୋଇଥିଲା । ଏହି ଅଭିଯୋଗକୁ ଆଧାର କରି ପୋଲିସ ୬ ଜଣଙ୍କୁ ଗିରଫ କରିଥିବା ବେଳେ ଏହି ଘଟଣାରେ ଆହୁରି ଅନେକଙ୍କ ସଂମ୍ପୃକ୍ତି ଥିବାରୁ ଆଗାମୀ ଦିନରେ ସେମାନଙ୍କୁ ଗିରଫ କରାଯିବ ବୋଲି ପୋଲିସ କହିଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
