ଯାଜପୁର: ଚିକିତ୍ସା ଅବହେଳାରୁ ଜଣେ ପ୍ରସୂତୀଙ୍କ ମୃତ୍ୟୁ ଅଭିଯୋଗ । ଏହାକୁ ନେଇ ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଉତ୍ତେଜନା ଦେଖାଯିବା ସହ ଭଙ୍ଗାରୁଜା କରାଯାଇଥିଲା। ଏ ଘଟଣାର ପ୍ରତିବାଦରେ ଡାକ୍ତରଖାନା ନିକଟରେ ଶବ ରଖି ରାସ୍ତାରୋକ କରିଛନ୍ତି ପରିବାର ଲୋକେ ।
ଜିଲ୍ଲାର ମଙ୍ଗଳପୁର ଥାନା ହସନପୁର ପଞ୍ଚାୟତ ଅନ୍ତର୍ଗତ ଚାନ୍ଦିପୁର ଗ୍ରାମର ରୁବିସ୍ମିତା ଜେନା(28) ପ୍ରସବ ଯନ୍ତ୍ରଣା କାରଣରୁ ତାଙ୍କୁ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ଏହି ସମୟରେ କୌଣସି ଡାକ୍ତର କିମ୍ବା ନର୍ସ ସେଠାରେ ଉପସ୍ଥିତ ନରହି ଭୋଜି ଖାଇବାକୁ ଯାଇଥିଲେ । ପ୍ରସୂତିଙ୍କ ସମ୍ପର୍କିୟ ଡାକ୍ତରଙ୍କୁ ଡାକିବାକୁ ଯାଇଥିଲେ ହେଁ ସେମାନେ ଆସିନଥିଲେ । ଫଳରେ ପ୍ରସୂତୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି ।
ଏନେଇ ସମ୍ପୃକ୍ତ ଡାକ୍ତର ଓ ନର୍ସଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରି ରାସ୍ତାରୋକ କରାଯାଇଛି । ଏନେଇ ହସ୍ପିଟାଲ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରି ନାହିଁ । ଅନ୍ୟପକ୍ଷେ ଘଟଣା ସମ୍ପର୍କରେ ଖବର ପାଇ ଯାଜପୁର ଅତିରିକ୍ତ ତହସିଲଦାଲ ପହଞ୍ଚି ଘଟଣାର ତଦନ୍ତ କରାଯିବ ବୋଲି ପ୍ରତିଶୃତି ଦେବା ସହ ମୃତକଙ୍କ ପରିବାରକୁ ବୁଝାସୁଝା କରିଛନ୍ତି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
