ଯାଜପୁର: ଜିଲ୍ଲାର ରୋଡ କ୍ଷେତ୍ରୀୟ ଚିକିତ୍ସାଳୟରେ ଆଜି ଜିଲ୍ଲା ପ୍ରଶାସନର ଅଚାନକ ଚଢାଉ । ରାଜ୍ୟ ସରକାରଙ୍କ ୫-ଟି କାର୍ଯ୍ୟକାରିତା ନେଇ ଏହି ଚଢାଉ କରାଯାଇଛି । ଚିକିତ୍ସାଳୟରେ କିପରି ଚାଲିଛି ସ୍ବାସ୍ଥ୍ୟସେବା, ସେ ସମ୍ପର୍କରେ ଏହି ଦଳ ତଦାରଖ କରିଛନ୍ତି । ବିଭିନ୍ନ ୱାର୍ଡ ବୁଲି ରୋଗୀ ଓ ତାଙ୍କ ସମ୍ପର୍କୀୟ ମାନଙ୍କ ଠାରୁ ବିଭିନ୍ନ ସମସ୍ୟା ସମ୍ପର୍କରେ ପଚାରି ବୁଝିଥିଲେ । ଚିକିତ୍ସାଳୟରେ ଥିବା ବିଭିନ୍ନ ସମସ୍ୟା ନେଇ ଅସନ୍ତୋଷ ମଧ୍ୟ ପ୍ରକାଶ କରିଥିଲେ । ଏହି ଚଢାଉ ଦଳରେ ଭାରପ୍ରାପ୍ତ ଜିଲ୍ଲାପାଳଙ୍କ ସମେତ ୫ ଜଣ ପ୍ରଶାସନିକ ଅଧିକାରୀ ସାମିଲ ଥିଲେ ।
କଳିଙ୍ଗନଗର ଶିଳ୍ପାଞ୍ଚଳ ସମେତ ବ୍ୟାସନଗର ପୌରାଞ୍ଚଳ, କୋରେଇ, ଦାନଗଦୀ ଓ ରସୁଲପୁର ଆଦି ୩ଟି ବ୍ଲକ ଏବଂ କେନ୍ଦୁଝର ଓ ଭଦ୍ରକ ଜିଲ୍ଲାର କିଛି ଅଞ୍ଚଳ ଏହା ଉପରେ ନିର୍ଭର କରନ୍ତି । ମାତ୍ର ଏଠାରେ ରହିଛି ଅନେକ ସମସ୍ୟା । ଏଠାକୁ ଚିକିତ୍ସା ପାଇଁ ଆସୁଥିବା ରୋଗୀ ମାନେ ସଠିକ ସ୍ବାସ୍ଥ୍ୟସେବା ପାଉନଥିବା ବିଭିନ୍ନ ସମୟରେ ଅଭିଯୋଗ ବି ହୋଇଛି । ତେବେ ସରକାରଙ୍କ ୫-ଟି ଯୋଜନା କାର୍ଯ୍ୟକାରୀ ହେବା ପରେ ଜିଲ୍ଳା ପ୍ରଶାସନର ଏକ ଟିମ ଏହି ଚିକିତ୍ସାଳୟରେ ଅଚାନକ ଚଢାଉ କରିଥିଲେ ।
ବିଶେଷ କରି 5-ଟି ଟିମର ନଜରରେ ଥିଲା ଲାବ୍ରୋଟାରୀ ଓ ବ୍ଲଡ୍ ବ୍ୟାଙ୍କରେ ଥିବା ବିଭିନ୍ନ ଅବ୍ୟବସ୍ଥା । ଅନ୍ୟପଟେ ଆଡମିଟ୍ ହୋଇଥିବା ରୋଗୀ ଓ ତାଙ୍କ ସମ୍ପର୍କୀୟ ମାନେ ମେଡିକାଲର ସମସ୍ୟା ସମ୍ପର୍କରେ ଟିମକୁ ଜଣାଇଥିଲେ । ଏଥିସହ ଚିକିତ୍ସାଳୟରେ କାର୍ଯ୍ୟ କରୁଥିବା ସଫେଇ କର୍ମଚାରୀମାନେ ମଧ୍ୟ ନିଜ ସମସ୍ୟା ବିଷୟରେ ଜଣାଇଥିଲେ । ତେବେ ତଦାରଖ ପରେ ଖୁବଶିଘ୍ର ସବୁ ସମସ୍ୟାର ସମାଧାନ କରାଯିବ ବୋଲି ଭାରପ୍ରାପ୍ତ ଜିଲ୍ଲାପାଳ କହିଛନ୍ତି ।
ଏହି ଗସ୍ତରେ ଭାରପ୍ରାପ୍ତ ଜିଲ୍ଲାପାଳ ମିହିର ପ୍ରସାଦ ମହାନ୍ତି, କଳିଙ୍ଗନଗର ଅତିରିକ୍ତ ଜିଲ୍ଲାପାଳ ସନ୍ତୋଷ କୁମାର ମିଶ୍ର, ଯାଜପୁର ରୋଡ ଏସ୍.ଡି.ପି.ଓ ଚିନ୍ମୟ କୁମାର ନାୟକ, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ସନ୍ତୋଷ ସେଠୀ ପ୍ରମୁଖ ସାମିଲ ଥିଲେ । ତେବେ ଦେଖିବାକୁ ବାକି ରହିଲା ଯେଉଁ ସବୁ ସମସ୍ୟା ବିଷୟରେ ଟିମ ଜାଣିଲେ ତାହାର ସମାଧାନ କେବେ ହେଉଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
