ଜଗସିଂହପୁର: ବ୍ୟବସାୟୀଙ୍କୁ ଅପହରଣ କରିବା ଘଟଣାରେ ତିନି ଜଣ ଗିରଫ । ମହାକାଳପଡ଼ା ଅରୁଣ ନଗରର ବ୍ୟବସାୟୀ ରଞ୍ଜିତ ମଣ୍ଡଳଙ୍କୁ ଅପହରଣ କରିବା ଘଟଣାରେ ପାରାଦୀପ ଅଭୟଚାନ୍ଦପୁର ପୋଲିସ ବୁଧବାର ତିନି ଜଣଙ୍କୁ ଗିରଫ କରିଛି । ତେବେ ସେମାନଙ୍କ ଠାରୁ ଅପହରଣରେ ବ୍ୟବହାର ହୋଇଥିବା କାର୍, ଗୋଟିଏ ଆପାଚୀ ମୋଟରସାଇକେଲ, ନଗଦ ୪ ହଜାର ଟଙ୍କା, ମୋବାଇଲ ଓ ଦୁଇଟି ଅଫୁଟା ଗୁଳି ସହ ବନ୍ଧୁକ ଜବତ କରିଛି ପୋଲିସ।
ସୂଚନା ମୁତାବକ, ରଞ୍ଜିତ ମଣ୍ଡଳ ଜଣେ ବ୍ୟବସାୟୀ ହୋଇଥିବା ବେଳେ ତାଙ୍କ ଘର ମହାକାଳପଡ଼ାର ଅରୁଣ ନଗର । ତେବେ ଗତ ୨୬ ତାରିଖ ଦିନ ରଞ୍ଜିତ କେନ୍ଦ୍ରାପଡା ସୁନିତି ଗ୍ରାମରେ ଥିବା ନିଜ ଶ୍ବଶୁର ଘରକୁ ଯାଇଥିଲେ ।
ଉକ୍ତ ଦିନ ବିଳମ୍ବିତ ରାତିରେ ଶ୍ରୀନିବାସ ମଣ୍ଡଳ, ସମିର ପ୍ରଧାନ ଓ ବଳରାମ ବେହେରା ନାମକ ତିନି ଜଣ ବ୍ୟକ୍ତି ତାଙ୍କୁ ଘର ବାହାରକୁ ଡାକି ଏକ କାର୍ ସାହାଯ୍ୟରେ ଅପହରଣ କରିଥିଲେ । ଏହାପରେ ତାଙ୍କୁ ଗଡ଼କୁଜଙ୍ଗ ଅଞ୍ଚଳ ଭୁୟିଆଁପାଳ ଚୁଙ୍ଗୁଡି ଘେରିରେ ରଖିବା ସହ ଜୋର ଜବରଦସ୍ତ ଟଙ୍କା ଦେବା ପାଇଁ ମାଡ଼ ମାରିଥିଲେ।
ତେବେ କୌଣସି ଉପାୟରେ ରଞ୍ଜିତ ସେମାନଙ୍କ ପାଖରୁ ଖସି ଆସି ପାରାଦୀପ ଅଭୟଚାନ୍ଦପୁର ଥାନାରେ ଏନେଇ ଏକ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରିବା ସହ ଚୁଙ୍ଗୁଡି ଘେରିରୁ ତିନି ଜଣକୁ ଗିରଫ କରିଛି।
ତେବେ ଅଭିଯୁକ୍ତ ଶ୍ରୀନିବାସ ଠାରୁ ରଞ୍ଜିତ୍ 1 ଲକ୍ଷ ଟଙ୍କା ନେଇ ଫେରାଇ ନଥିବାରୁ ସେମାନେ ରଞ୍ଜିତଙ୍କୁ ଅପହରଣ କରିଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । ବୁଧବାର ପୋଲିସ ତିନି ଜଣକୁ କୋର୍ଟ ଚାଲାଣ କରିବା ସହ ଏହି ଘଟଣାରେ ଆଉ କିଏ ଅଛନ୍ତି ତାହାର ତଦନ୍ତ କରୁଛି।
ଜଗସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
