ଜଗତସିଂହପୁର: ସହରରେ ଥିବା ନବକୃଷ୍ଣ ଚୌଧୁରୀ ଷ୍ଟାଡିୟମ(nabakrushna chowdhury stadium) ଏବେ ଚରମ ଅବହେଳାର ଶିକାର ହୋଇଛି। ଖେଳକୁଦ ପାଇଁ ସ୍ବତନ୍ତ୍ର ମହତ୍ବ ବହନ କରୁଥିବା ଏହି ଷ୍ଟାଡିୟମ, ଏବେ ହତଶିରୀ । ଗତ 15 ଦିନ ହେବ ଟାଟା ପାୱାର(Tata power) ତାର ପାୱାର ଦେଖାଇ ଷ୍ଟାଡିୟମରୁ ବିଦ୍ୟୁତ ସଂଯୋଗ ବିଚ୍ଛିନ୍ନ କରି ଦେଇଥିବା ବେଳେ ଜିଲ୍ଲା କ୍ରୀଡା ବିଭାଗ ଚୁପ୍ ରହିଛି ।
ଜିଲ୍ଲା ପ୍ରଶାସନ ଦ୍ବାରା ପରିଚାଳିତ ଏହି ଷ୍ଟାଡିୟମରେ କ୍ରୀଡା ବିଭାଗ ପକ୍ଷରୁ ପୂର୍ବତନ ଜିଲାପାଳ ସଂଗ୍ରାମ କେଶରୀ ମହାପାତ୍ର ଥିବା ସମୟରେ କୋଟି କୋଟି ଟଙ୍କା ଖର୍ଚ୍ଚ କରାଯାଇ ଆଧୁନିକୀକରଣ କରାଯାଇଥିଲା । ଷ୍ଟାଡିୟମ ଚତୃପାର୍ଶ୍ଵରେ ଦାମୀ ଗଛ ଲଗାଯିବା ସହିତ ପିଚ୍କୁ ଖେଳ ଉପଯୋଗୀ କରାଯାଇଥିଲା। କିନ୍ତୁ ବର୍ତ୍ତମାନ ଜିଲ୍ଲା ପ୍ରଶାସନ ଓ କ୍ରୀଡା ବିଭାଗ ର ଅବହେଳା ଯୋଗୁଁ ଷ୍ଟାଡିୟମଟି ମରୁଭୂମିରେ ପରିଣତ ହୋଇଛି।
ଛୋଟ ସବୁଜିମା ଘାସରେ ପରିପୂର୍ଣ୍ଣ ଥିବା ଷ୍ଟାଡିୟମ, ଏବେ ଟାଙ୍ଗରା ଭୂଇଁ ପାଲଟିଛି । ଏପରିକି ଗତ 15 ଦିନ ହେବ ଟାଟା ପାୱାର ବିନା ନୋଟିସରେ ବିଦ୍ୟୁତ ସଂଯୋଗ ବିଚ୍ଛିନ୍ନ କରି ଦେଇଥିବାରୁ ପାଣି ସମସ୍ୟା ଦେଖା ଦେଇଛି । ପାଣିବିନା ଘାସ ଗାଲିଚା ସହ ଦାମୀ ଗଛ ଗୁଡିକ ସୁଖି ଗଲାଣି। ଏହାକୁ ନେଇ ଷ୍ଟାଡିୟମକୁ ଆସୁଥିବା କ୍ରୀଡାବିତ ଓ କ୍ରୀଡା ପ୍ରେମୀମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏ ସମ୍ପର୍କରେ ଆମେ ଜିଲ୍ଲା କ୍ରୀଡା ଅଧିକାରୀ ବିଶ୍ବ ବିଜୟିନୀ ପଟ୍ଟନାୟକଙ୍କ ସହ ଯୋଗାଯୋଗ କରିଥିଲେ ବି ତାଙ୍କର ପ୍ରତିକ୍ରିୟା ମିଳିପାରି ନାହିଁ ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
