ଜଗତସିଂହପର: ସମୟ ବଦଳିଛି । ବିତିଯାଇଛି 20 ବର୍ଷ । ଆସିଛି କେତେ ପ୍ରାକୃତିକ ବିପର୍ଯ୍ୟୟ । ଫାଇଲିନ, ହୁଡହୁଡ, ତିତଲି । ଅଣ୍ଟା ଭାଙ୍ଗିଛି, ପୁଣି ସଳଖିଛି । ଲୋକେ କାନ୍ଦିଛନ୍ତି । ଲୁହ ପୋଛି ପୁଣି ଘର ସଜାଡିଛନ୍ତି । କିନ୍ତୁ ଲିଭିନି ସେଦିନର ଲୁହ । ବଦଳିନି ସେ ସମୟର ଚିତ୍ର ।
ଆଜି ବି ମନେପଡେ ସେହି ଗର୍ଜନ । ଆଜି ବି ଆଖି ସାମନାରେ ଭାସିଉଠେ ସେହି କରାଳ ରୂପ । ସମୟ ବଦଳିଛି ହେଲେ ଛାପ ଛାଡିଯାଇଛି । ଆମେ କହୁଛୁ 20 ବର୍ଷ ତଳର କାହାଣୀ । ଯେଉଁ କାଳରାତିକୁ ଜଗତସିଂହପୁରବାସୀ କେବେବି ଭୁଲିପାରିବେନି । ସେଦିନ ଥିଲା 1999 ମସିହା ଅକ୍ଟୋବର 29 ଶୁକ୍ରବାର । ଅଚାନକ ଲ୍ୟାଣ୍ଡଫଲ ବାତ୍ୟା ଆଉ ତା’ ପରେ ବିଭୀଷିକା । ପ୍ରକୃତିର ତାଣ୍ଡବରେ ହାର ମାନିଥିଲା ଜୀବଜଗତ ।
କାଲି ଭଳି ଲାଗୁଛି । ହଠାତ ପ୍ରଳୟଙ୍କରୀ ପବନ । 100 କି 200 ନୁହେଁ, 280 କିଲୋମିଟର ବେଗ । ମାଡିଆସିଲା 30 ଫୁଟ ଉଚ୍ଚ ଜୁଆର । କିଛି ଭାବିବା ପୂର୍ବରୁ ମାଟିରେ ମିଶିଗଲା ଘରଦ୍ଵାର । ଚାଲିଗଲା ହଜାର ହଜାର ଜୀବନ । ନିଶ୍ଚିହ୍ନ ହୋଇଗଲା ଜପା ପଞ୍ଚାୟତର ଦହିବର, ଆମ୍ବିକି, କାଙ୍କଣ ଗ୍ରାମ । ପ୍ରାଣ ହରାଇଲେ 1600ରୁ ଅଧିକ ଲୋକ । ବର୍ତ୍ତି ପାରିଲେନି ହଜାର ହଜାର ପଶୁପକ୍ଷୀ ।ଛାରଖାର ହୋଇଗଲା କେନ୍ଦ୍ରାପଡା ଓ ଜଗତସିଂହପୁର । ପ୍ରଭାବିତ ହେଲେ 10 ଲକ୍ଷ ଲୋକ ।
ଚାହୁଁଚାହୁଁ ବିତିଗଲା ସମୟ । କିନ୍ତୁ ଆଜି ବି ମନେପଡିଲେ ଟାଙ୍କୁରି ଉଠେ ଲୋମ । ଥରିଉଠେ ଛାତି । ଲିଭିଯାଇଛି କେତେ ସିନ୍ଦୂର । ଆତ୍ମୀୟଙ୍କୁ ହରାଇଛନ୍ତି ଅନେକ ପରିବାର । ସେପଟେ ଆଜିବି ବାତ୍ୟା ନାଁ ଶୁଣିଲେ ଶିହରି ଉଠନ୍ତି ଜଗତସିଂହପୁରବାସୀ ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
