ଜଗତସିଂହପୁର: ମୁଁ ବଞ୍ଚିବାକୁ ଚାହେଁ, ଦୟାକରି ମୋତେ ବଞ୍ଚାଇ ଦିଅନ୍ତୁ, ମୁଁ ଚାଲିଗଲେ ମୋର ୨ଝିଅ ଅନାଥ ହୋଇଯିବେ, ମରିବାକୁ ଚାହେଁନା । ଏହିଭଳି କିଛି କରୁଣ ନିବେଦନ କରିଛନ୍ତି ଜଗତସିଂହପୁର ସଦର ବ୍ଲକ ଅନ୍ତର୍ଗତ ଅଁଳା ପଞ୍ଚାୟତ ଚାନ୍ଦଗଡର ଆର୍ତ୍ତତ୍ରାଣ ମଲ୍ଲିକ। ଟିଉସନ୍ କରି ଜିବିକା ନିର୍ବାହ କରୁଥିବା ଆର୍ତ୍ତତ୍ରାଣ ୩ବର୍ଷ ହେବ ବିରଳ ମାସ୍ଥାନିଆ ଗ୍ରାଭିସ୍ ରୋଗରେ ଆକ୍ରାନ୍ତ ।
ରୋଗରେ ଆକ୍ରାନ୍ତ ହେବା ପରେ ପ୍ରଥମେ ଜଗତସିଂହପୁର ଓ ପରେ କଟକରେ ଚିକିତ୍ସିତ ହୋଇଥିଲେ ଆର୍ତ୍ତତ୍ରାଣ । କିନ୍ତୁ ରୋଗ ଜଣା ପଡିବାପରେ ଡାକ୍ତର ତାଙ୍କୁ ଦିଲ୍ଲୀ ଏଆଇଆଇଏସ(AIIMS)ରେ ଚିକିତ୍ସା ପାଇଁ କହିଥିଲେ । ଘରେ ଯାହାଥିଲା ବିକିଭାଙ୍ଗି 2 ମାସ ଦିଲ୍ଲୀ ଏମସ୍ରେ ଚିକିତ୍ସିତ ହୋଇ ଫେରିବା ପରେ ପୁଣି ଥରେ ଚିକିତ୍ସା ପାଇଁ ଡାକ୍ତର ପରାମର୍ଶ ଦେଇଛନ୍ତି । କିନ୍ତୁ ଅର୍ଥ ବାଧକ ସାଜିଛି ଆର୍ତ୍ତତ୍ରାଣଙ୍କ ଚିକିତ୍ସାରେ । ପ୍ରତି ମାସରେ ବହୁ ଅର୍ଥ ଔଷଧ ପାଇଁ ଦରକାର ହେଉଥିବା ବେଳେ ସରକାରୀ ସାହାଯ୍ୟ ମିଳିପାରି ନାହିଁ । ଘରେ ଏକମାତ୍ର ରୋଜଗାରକ୍ଷମ ଆର୍ତ୍ତତ୍ରାଣ ଅଚଳ ହୋଇଯିବା ପରେ ଏବେ ୨ବେଳା ଖାଇବାକୁ ମିଳିବା ମଧ୍ୟ କଷ୍ଟକର ହୋଇପଡିଥିବା ତାଙ୍କ ସ୍ତ୍ରୀ ସୁଜାତା କହିଛନ୍ତି । ତେବେ ଜିଲ୍ଲା ପ୍ରଶାସନ ବା କୌଣସି ସହୃଦୟ ବ୍ୟକ୍ତି ତାଙ୍କୁ ସହାୟତା କରନ୍ତୁ ବୋଲି ଆକୁଳ ନିବେଦନ କରିଛନ୍ତି ଆର୍ତ୍ତତ୍ରାଣ ।
ଜଗତସିଂପୁରରୁ ସୁଶାନ୍ତ ପାତ୍ର, ଇଟିଭି ଭାରତ
