ଜଗତସିଂହପୁର: ଏବେ ଧାନ ଅମଳ ସମୟ । ଏପଟେ ଆକାଶରେ ବର୍ଷା ଦେଖି ଚାଷୀ ଛାତିରେ ଛନକା ପସିଛି । ଗତ ନଭେମ୍ବର ମାସରେ ବାତ୍ୟା ବୁଲବୁଲ ଚାଷୀର ଅଣ୍ଟା ଭାଙ୍ଗି ଦେଇଥିଲା । ଆଉ ସେଥିରୁ ଯାହାକିଛି ବର୍ତ୍ତି ଯାଇଛି ତାକୁ କିପରି ସାଇତିକି ରଖିବେ ସେଥିପାଇଁ ଚିନ୍ତାରେ ଚାଷୀ ।
ଆଜି ସକାଳୁ ସକାଳୁ ଜିଲ୍ଲାରେ ଝିପି ଝିପି ବର୍ଷା ଆରମ୍ଭ ହୋଇଯାଇଥିଲା । ପ୍ରବଳ କୁହୁଡି ସାଙ୍ଗକୁ ଯଦି ଅସରାଏ ଦିଅସରା ବର୍ଷା ହୋଇଯାଏ ତେବେ ପାଚିଲା ଧାନ ଗୁଡିକ ଗଜା ହୋଇଯିବ । ଏକଥା ଭାବି ଚାଷୀର ଆଖିରେ ନିଦ ନାହିଁ । ଦିନ ରାତି ଏକ କରି ବିଲରୁ ଧାନ କାଟି ସୁରକ୍ଷିତ ସ୍ଥାନକୁ ଆଣିବା ପାଇଁ ଲାଗି ପଡିଛନ୍ତି ଜଗତସିଂହପୁର ସଦର ବ୍ଲକ ଅନ୍ତର୍ଗତ ମୁରୁଣିଆ, ଇଚ୍ଛାପୁର, ଅଢେଇକୁଳ ଓ ଦାମୋଦରପୁର ଚାଷୀ ।
ଅପରପକ୍ଷରେ ଧାନ ଅମଳ ପାଇଁ ଅମଳ ମେସିନ ମିଳୁ ନଥିବାରୁ ଚାଷୀମାନଙ୍କ ପାଇଁ ସମସ୍ୟା ସୃଷ୍ଟି ହେଉଛି । ବର୍ଷା ପୂର୍ବରୁ କିପରି ନିଜର ବର୍ଷକ ଆହାରକୁ କିପରି ନିଜ ଖଳାକୁ ଅଣାଯାଇ ପାରିବ ସେହି ଚିନ୍ତାରେ ଚାଷୀ ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
