ଜଗତସିଂହପୁର: ବାତ୍ୟା 'ଫନି' ସବୁକିଛି ଛାରଖାର କରିଦେଇଛି । ଜୀବନ ଜୀବିକା ସବୁ କିଛି ଛଡାଇ ନେଇଛି 'ଫନି'।
ହେଲେ ବାତ୍ୟା ଯିବାର ଆଜିକୁ 11 ଦିନ ହୋଇଥିଲେ ମଧ୍ୟ ଏବେବି ଲାଗି ରହିଛି ବିଦ୍ୟୁତ ସମସ୍ୟା । ପାଣି ପରେ ପ୍ରମୁଖ ସମସ୍ୟା ଭାବେ ଉଭା ହେଇଛି ବିଜୁଳି । ଜିଲ୍ଲାରେ ଅସହ୍ୟ ରୌଦ୍ରତାପ ଜିଲ୍ଲାବାସୀଙ୍କ ନିଦ ହଜାଇ ଦେଇଛି ।
'ଫନି' ଯିବାର ବହୁଦିନ ବିତିଯାଇଥିଲେ ବି ଅସଜଡା ହୋଇ ପଡିଛି ବିଦ୍ୟୁତ ବିଭାଗ । କଚ୍ଛପ ଗତିରେ ଚାଲୁଛି କାମ । ଏହାକୁ ନେଇ ଜନ ଆକ୍ରୋଶ ଅନ୍ଦୋଳନର ରୂପ ନେଲାଣି । ଜିଲ୍ଲାରେ ମଙ୍ଗଳବାର ଏକାଧିକ ସ୍ଥାନରେ ବିଦ୍ୟୁତ ପାଇଁ ରାସ୍ତାରୋକ ହୋଇଛି । ବିରିଡି. ରଘୁନାଥପୁର, ବାଲିଆ ଷ୍ଟୋର, ଢିଅସାହି-ତରିକୁନ୍ଦ ଅଞ୍ଚଳର ଲୋକେ ଜାତୀୟ ରାଜପଥ ଅବରୋଧ କରିଛନ୍ତି ।
ତେବେ ବାଲିକୁଦା ଅଞ୍ଚଳରେ ବିଦ୍ୟୁତ କର୍ମଚାରୀଙ୍କୁ ଲୋକେ ମାଡ ମାରିଥିବା ଅଭିଯୋଗ ହୋଇଛି । ବିଦ୍ୟୁତକୁ ନେଇ ଲୋକେ ଉଗ୍ର ହୋଇପଡୁଥିବା ବେଳେ ପୋଲିସର ମୁଣ୍ଡ ବିନ୍ଧାର କାରଣ ପାଲଟିଛି । ଜିଲ୍ଲା ବିଦ୍ୟୁତ ନିର୍ବାହୀ ଯନ୍ତ୍ରୀ ଜଗଦୀଶ ସାହୁ କହିଛନ୍ତି, ଜିଲ୍ଲାରେ ୭୦ ପ୍ରତିଶତ ବିଦ୍ୟୁତ ସଂଯୋଗ କରାଗଲାଣି । ଅବଶିଷ୍ଟ ଅଞ୍ଚଳକୁ ଖୁବଶିଘ୍ର ବିଦ୍ୟୁତ ସଂଯୋଗ କରିଦିଆଯିବ। କିନ୍ତୁ ବାସ୍ତବରେ ତାହା ହୋଇନଥିବା ହେତୁ ଲୋକେ ଅସନ୍ତୋଷ ହୋଇ ରାଜରାସ୍ତାକୁ ଓହ୍ଲାଉଥିବା ଦେଖିବାକୁ ମିଳିଛି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
