ଜଗତସିଂହପୁର: ଦାଉ ସାଧିଲା ଦଇବ । ଯେମିତି ସୁନାର ସଂସାର ଉପରେ ପଡିଗଲା କାହାର ଖରାପ ନଜର । ଆଉ କିଛି ସମୟ ଭିତରେ ବଦଳିଗଲା ପରିବାରର ଚିତ୍ର । ଘରର ରୋଜଗାରିଆ ପୁଅ ହରାଇଲା ମାନସିକ ଭାରସାମ୍ୟ । ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଲକ ଗରାମ ପଞ୍ଚାୟତ ବନଦୁର୍ଗା ଗ୍ରାମର ସୁକାନ୍ତ ଜେନା। ବୟସ ପାଖାପାଖି 40 ହେବ । ସ୍ତ୍ରୀ, ଦୁଇ ପିଲା ଓ ବୃଦ୍ଧା ମାଆକୁ ନେଇ ତାଙ୍କର ସଂସାର। ପରିବାର ପ୍ରତିପୋଷଣ ପାଇଁ ଯାଇଥିଲେ ସୁଦୂର ହାଇଦ୍ରାବାଦର ଏକ ଘରୋଇ କମ୍ପାନୀରେ ସେ କାମ କରିବା ପାଇଁ ଯାଇଥିଲେ ।
ହେଲେ ବିଧିର ବିଧାନ କିଛି ଭିନ୍ନ ଥିଲା । ହଠାତ ମାନସିକ ରୋଗର ଶିକାର ହୋଇଥିଲେ ସୁକାନ୍ତ। କମ୍ପାନୀ ଲୋକ ସୁକାନ୍ତଙ୍କୁ ଗାଁରେ ଛାଡ଼ିଦେଇ ଚାଲିଗଲେ।ପୁଅର ଏମିତି ଅବସ୍ଥା ଦେଖି ମାଆ ଧୋବିଲତାଙ୍କ ମୁଣ୍ଡରେ ପଡିଥିଲା ଚଡକ । ଘରେ ଯାହା ଯୋଉଠି ଥିଲା ବିକି ଭାଙ୍ଗି ସୁକାନ୍ତକୁ କଟକ ନିଆଗଲା। ହେଲେ ଚିକିତ୍ସାରେ ଅର୍ଥ ସାଜିଲା ବାଧକ । ହସ୍ପିଟାଲରୁ ଘରକୁ ଫେରାଇ ଆଣିଲେ ପରିବାର । ଏହି ଘଟଣାକୁ ବିତିଗଲାଣି 15 ବର୍ଷ । 4 ବର୍ଷ ତଳେ ତାଙ୍କ ସ୍ଥିତି ଅଧିକ ଖରାପ ହେବାରୁ ପଡିଶା ଓ ପରିବାର ତାଙ୍କୁ ଲୁହା ଶିକୁଳିରେ ବାନ୍ଧି ରଖିଛନ୍ତି ।
ଏପଟେ ସାତ ଜନ୍ମର ସାଥି ହୋଇ ରହିବାକୁ କଥା ଦେଇଥିବା ପତ୍ନୀ ମଧ୍ୟ ଅଧା ରାସ୍ତାରେ ସୁକାନ୍ତଙ୍କୁ ଛାଡି ବାପଘରକୁ ଚାଲିଗଲେ । ହେଲେ ଏତିକିରେ ସରିନଥିଲା ସୁକାନ୍ତଙ୍କ ଦୁଃଖ । ହଠାତ ଅସୁସ୍ଥ ହୋଇ ପଡିଲେ ସୁକାନ୍ତର ମାଆ ଧୋବିଲତା। ଗ୍ରାମବାସୀ ଚାନ୍ଦା ଆଦାୟ କରି ଧୋବିଲତାଙ୍କୁ ନେଲେ ଡାକ୍ତରଖାନା । ପରୀକ୍ଷା ନୀରିକ୍ଷା ପରେ ଜଣା ପଡିଲା ସେ ସ୍ତନ କର୍କଟରେ ଆକ୍ରାନ୍ତ ।
ବର୍ତ୍ତମାନ ଏକାଠି ଅସହ୍ୟ ଯନ୍ତ୍ରଣା ଭୋଗୁଛନ୍ତି ମାଆ ପୁଅ । ଏଭଳି ସ୍ଥିତି ପରିବାରକୁ ଯେପରି ଭାଙ୍ଗି ଦେଇଛି। ଏଇ ଦୁଃଖି ପରିବାରକୁ ସରକାର ଭତ୍ତା ଟିଏ ଦେଇ ନିଜର ଦାୟିତ୍ବ ସାରିଦେଉଛନ୍ତି । ଯଦି କିଛି ସରକାରୀ ସହାୟତା ମିଳିପାରନ୍ତା, କିଛିଟା କଷ୍ଟରୁ ମୁକ୍ତି ମିଳିବ ବୋଲି ଗ୍ରାମବାସୀ ପ୍ରଶାସନକୁ ନିବେଦନ କରିଛନ୍ତି ।
ଜଗତସିଂହପୁରରୁ ସୁଶାନ୍ତ ପାତ୍ର,ଇଟିଭି ଭାରତ
