ବ୍ରହ୍ମପୁର: ଆକ୍ସନ ମୁଡରେ ଭିଜିଲାନ୍ସ । ଆୟ ବର୍ହିଭୂତ ସମ୍ପତ୍ତି ଠୁଳ ନେଇ ଅନେକ କର୍ମଚାରୀଙ୍କୁ କାବୁ କରିଛି ଭିଜିଲାନ୍ସ । ଏଥର ବ୍ରହ୍ମପୁର ସହରର ଏନଏମଆର କର୍ମଚାରୀଙ୍କ ଘରେ ଆୟ ବର୍ହିଭୂତ ସମ୍ପତ୍ତି ନେଇ ଚଢାଉ କରିଛି ଭିଜିଲାନ୍ସ ବିଭାଗ ।
ସହରର କୋଟିପତି ଅଙ୍ଗନାୱାଡି କର୍ମୀଙ୍କ ପରେ ଆରମ୍ଭ ହୋଇଥିବା ଏହି ଚଢାଉରେ ବୁଧବାର ଭିଜିଲାନ୍ସ ଟିମ୍ ପକ୍ଷରୁ ସହରର ସରକାରୀ ଲିଙ୍ଗରାଜ ଆଇନ ମହାବିଦ୍ୟାଳୟର ଡି.ଏଲ୍.ଆର୍ ଟାଇପିଷ୍ଟ ପ୍ରଶାନ୍ତ କୁମାର ନାୟକଙ୍କ ଘରେ ଚଢାଉ କରିଛି । ତାଙ୍କ ବାସଭବନ ସହିତ ପାଞ୍ଚୋଟି ସ୍ଥାନରେ ଏକ ସହିତ ଚଢାଉ ହୋଇଛି । ସହରର ଆସିକା ରୋଡରେ ରହିଥିବା ତିନି ମହଲା କୋଠା ବିଶିଷ୍ଟ ମୋଟର ଷ୍ଟୋର ପାର୍ଟ ଦୋକାନ ସମେତ ସହରର ବ୍ୟାଙ୍କ କୋଲୋନିରେ ରହିଥିବା ତିନି ମହଲା କୋଠା , ଆସିକା ରୋଡରେ ରହିଥିବା ଦୁଇ ମହଲା ବିଶିଷ୍ଟ ଗୋଦାମ ଘର, ବୃନ୍ଦାବନ ନଗରରେ ଭଡା ସୁତ୍ରରେ ରହିଥିବା ଏକ ଗୋଦାମରେ ଚଢାଉ କରିଛି ଭିଜିଲାନ୍ସ ବିଭାଗ ।
ଚଢାଉରେ ତାଙ୍କ ଘରୁ ୧୮ ଲକ୍ଷ 5ହଜାର 10 ନଗଦ ଟଙ୍କା ଜବତ ହୋଇଥିବା ନେଇ ଭିଜିଲାନ୍ସ ବିଭାଗ ପକ୍ଷରୁ ସୂଚନା ମିଳିଛି । ଗତ କିଛି ଦିନ ମଧ୍ୟରେ ଲଗାତର ଭାବରେ ଭିଜିଲାନ୍ସ ବିଭାଗ ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଚଢାଉ କରିଥିବା ବେଳେ ଏହାକୁ ନେଇ ଅସାଧୁ କର୍ମଚାରୀଙ୍କ ମଧ୍ୟରେ ଭୟ ସୃଷ୍ଟି କରିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
