ବ୍ରହ୍ମପୁର: କେମିତି ଚାଲିଛି ଆମ ଶିକ୍ଷା ବ୍ୟବସ୍ଥା । କିଭଳି ହେଉଛି ଶିକ୍ଷାଦାନ, ଏହାକୁ ନେଇ ସବୁବେଳେ ଉଠିଥାଏ ପ୍ରଶ୍ନ? ଏଭଳି ତମାମ ପ୍ରଶ୍ନର ଉତ୍ତର ଏକ ଭାଇରାଲ ଭିଡିଓରେ ଦେଖିବାକୁ ମିଳିଛି । ପାଠପଢିବାକୁ ଆସି ହାଣୁଛନ୍ତି ଗଛ, ବୋହୁଛନ୍ତି ରୋଷେଇ ପାଇଁ ବ୍ୟବହୃତ ହାଣ୍ଡିହଣ୍ଡା ।
ଏ ଘଟଣା ହେଉଛି ଗଞ୍ଜାମ ଜିଲ୍ଲାର ବୁଗୁଡା ବ୍ଲକ ଭଗବତ ସ୍ବାମୀ ଉନ୍ନୀତ ଉଚ୍ଚ ବିଦ୍ୟାଳୟର । ସ୍କୁଲରେ ଆୟୋଜିତ ଏହି କାର୍ଯ୍ୟକ୍ରମ ପାଇଁ ଛାତ୍ରଛାତ୍ରୀ ହାଣ୍ଡିହଣ୍ଡା ଆଣିବା ସହ ବୋହୁଛନ୍ତି କାଠ । ଅନ୍ୟ ଦୃଶ୍ୟ ହେଉଛି ପୋଲସରା ସ୍ଥିତ ଗୋପବନ୍ଧୁ ହାଇସ୍କୁଲର । ଯେଉଁଠି କିଛି ଛାତ୍ର ଗଛ ଚଢି ହାଣୁଛନ୍ତି ଗଛଡାଳ । ଏଭଳି ଦୁଇଟି ଭିଡିଓ ଏବେ ଭାଇରାଲ ହେବାରେ ଲାଗିଛି । ଯେଉଁଥିରୁ ବେଶ ସ୍ପଷ୍ଟ ହୋଇପଡୁଛି ଆମ ଦେଶର ଭବିଷ୍ୟତଙ୍କ ଭବିଷ୍ୟତ। ସେପଟେ, ଘଟଣାକୁ ଅତି ହାଲୁକା ଭାବେ ନେଇଛନ୍ତି ବୁଗୁଡା ବ୍ଲକ ତାକରଡା ସ୍କୁଲର ପ୍ରଧାନଶିକ୍ଷକ।
ସରକାରୀ ସ୍କୁଲରେ ଗୁଣାତ୍ମକ ଶିକ୍ଷାଦାନ ପାଇଁ ପାଇଁ ସରକାର ବେଶ ମୋଟା ଅଙ୍କର ଟଙ୍କା ଖର୍ଚ୍ଚ କରୁଛନ୍ତି । ଶିକ୍ଷକଙ୍କୁ ଦରମା ଦେଉଛନ୍ତି। ହେଲେ ଶିକ୍ଷକ ପିଲାଙ୍କୁ ଶିକ୍ଷାଦାନ କରିବା ବଦଳରେ ଦେଉଛନ୍ତି କର୍ମଦାନ। ଯେଉଁଠି ପିଲାଙ୍କୁ ଶିକ୍ଷା ଦେଇ ସେମାନଙ୍କର ଭବିଷ୍ୟତ ଗଠନ କରିବା ପାଇଁ ପଥପ୍ରଦର୍ଶକ ହେବା କଥା, ସେଠି ହାତରେ ଧରାଇଛନ୍ତି ଟାଙ୍ଗିଆ । ଏ ଘଟଣାକୁ ନେଇ ଏବେ ସ୍ଥାନୀୟ ଅଞ୍ଚଳରେ ଦେଖାଦେଇଛି ଅସନ୍ତୋଷ । ଘଟଣା ସମ୍ପର୍କରେ ଆମେ ଜିଲ୍ଲା ଶିକ୍ଷା ଅଧିକାରୀଙ୍କୁ ଅବଗତ କରାଇବାରୁ ସେ କହିଛନ୍ତି ଘଟଣାର ତଦନ୍ତ କରାଯିବା ପରେ ଆବଶ୍ୟକୀୟ ପଦକ୍ଷେପ ନିଆଯିବ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
