ବ୍ରହ୍ମପୁର: ପଞ୍ଚାୟତର ନିର୍ଦ୍ଦେଶକୁ ଉଲଙ୍ଘନ କରି ବାହାରେ ମଳତ୍ୟାଗ କରିବା ଶେଷରେ ପଡିଛି ମହଙ୍ଗା । ନିଜର ପାଇଖାନା ଥାଇ ବାହାରେ ମଳତ୍ୟାଗ କରୁଥିବା ଅଭିଯୋଗରେ ୨୪ଟି ପରିବାରକୁ ରାସନ କାର୍ଡରେ ଯୋଗାଣ ସାମଗ୍ରୀକୁ ବନ୍ଦ କରିଦେଇଛନ୍ତି ସରପଞ୍ଚ । ଏଭଳି ପଦକ୍ଷେପ ଦେଖିବାକୁ ମିଳିଛି ଗଞ୍ଜାମ ଜିଲ୍ଲାର ସାନଖେମୁଣ୍ଡି ବ୍ଲକ ଅନ୍ତର୍ଗତ ଗୌତମୀ ପଞ୍ଚାୟତରେ । ବାହାରେ ମଳତ୍ୟାଗକୁ ବିରୋଧ କରି ପଞ୍ଚାୟତର ମହିଳା ସ୍ବୟଂସହାୟକ ଗୋଷ୍ଠୀର ତିନି ଶହରୁ ଊର୍ଦ୍ଧ୍ବ ସଦସ୍ୟ ମିଳିତ ଭାବରେ ଉଦ୍ୟମ ଜାରି ରଖିଛନ୍ତି । ସେମାନେ ଲୋକଙ୍କୁ ବାହାରେ ସକାଳ ଓ ସଂଧ୍ୟାରେ ବିଭିନ୍ନ ସ୍ଥାନରେ ଉପସ୍ଥିତ ରହି ବାହ୍ୟମଳ ତ୍ୟାଗକୁ ରୋକୁଛନ୍ତି । ରାସନକାର୍ଡକୁ ବନ୍ଦ କରାଯିବାର ଗତ ୧୨ ଦିନ ମଧ୍ୟରେ ଲୋକଙ୍କ ଉପରେ ପ୍ରଭାବ ପଡିଥିବା ଦେଖିବାକୁ ମିଳିଛି ।
ନିୟମିତ ଭାବରେ ଶହ ଶହ ମହିଳା ମାନେ ପଞ୍ଚାୟତକୁ ସଂଯୋଗ କରୁଥିବା ମୁଖ୍ୟରାସ୍ତା କଡରେ ସକାଳ ଓ ସନ୍ଧ୍ୟା ସମୟରେ ଜଗି ରହୁଛନ୍ତି । ଏଥିସହ ଅଞ୍ଚଳବାସୀ ଯେପରି କେହି ମଳତ୍ୟାଗ ନ କରିବେ, ସେଥିପାଇଁ ରାସ୍ତାକଡରେ ତୁଳସୀ, ବେଲ, ଗୋଲାପ ଆଦି ଗଛ ଲଗାଇ ଏହାର ଯତ୍ନ ନେଉଥିବା ଦେଖାଯାଇଛି । ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ସାରା ଜିଲ୍ଲାକୁ ବାହ୍ୟମଳମୁକ୍ତ କରିବା ପାଇଁ ପଞ୍ଚାୟତକୁ ପଞ୍ଚାୟତ ପରିକ୍ରମା କରି ଜିଲ୍ଲାପାଳ ବାହାରେ ମଳତ୍ୟାଗ କରୁଥିବା ବ୍ୟକ୍ତି ବିଶେଷଙ୍କୁ ସଚେତନ କରାଇଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
