ବ୍ରହ୍ମପୁର: ନକଲି ଶିକ୍ଷାଗତ ପ୍ରମାଣପତ୍ର ଦେଇ ଚାକିରୀ କରିବା ମାମଲାରେ ପୁଣି ଜିଲ୍ଲାର 3ଜଣ ଶିକ୍ଷକଙ୍କୁ ବହିଷ୍କାର କରିଛନ୍ତି ଜିଲ୍ଲା ଶିକ୍ଷାଧିକାରୀ । ଜିଲ୍ଲାପାଳଙ୍କ ନିର୍ଦ୍ଦେଶ ପରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ଜିଲ୍ଲାର ଧରାକୋଟ ବ୍ଲକର ବିଭିନ୍ନ ବିଦ୍ୟାଳୟରେ କାର୍ଯ୍ୟରତ ଥିବା କନିଷ୍ଠ ଶିକ୍ଷକ ସନ୍ତୋଷ କୁମାର ସେଠୀ, ସହକାରୀ ଶିକ୍ଷକ ବିନୋଦ ବିହାରୀ ସେଠୀ ଓ ବଳରାମ ବିଷୋୟୀ ନକଲି ଶିକ୍ଷାଗତ ପ୍ରମାଣପତ୍ର ଦେଇଥିବା ନେଇ ଜଣାପଡିଛନ୍ତି । ଏପରିକି ସର୍ବଶିକ୍ଷା ଅଭିଯାନର ପ୍ରକଳ୍ପ ସଂଯୋଜକଙ୍କୁ ଏହି 3 ଶିକ୍ଷକଙ୍କୁ ଚାକିରୀରୁ ବହିଷ୍କାର କରିବାକୁ ନିର୍ଦ୍ଦେଶ ଦିଆଯାଇଛି । ମୁଖ୍ୟତଃ ନିଯୁକ୍ତି ସମୟରେ ପ୍ରଦାନ କରିଥିବା ମାଟ୍ରିକର ପାସ୍ ପ୍ରମାଣପତ୍ର ଏବଂ ପ୍ରକୃତ ପ୍ରମାଣପତ୍ର ମଧ୍ୟରେ ତାଳମେଳ ରହୁନଥିବାରୁ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ପୂର୍ବରୁ ଜିଲ୍ଲାର ଧରାକୋଟ ବ୍ଲକର 4ଜଣ ଶିକ୍ଷକଙ୍କୁ ଗତ 2 ତାରିଖରେ ବହିଷ୍କାର କରାଯାଇଥିଲା । ସେପଟେ ବର୍ତ୍ତମାନର ଏହି କାର୍ଯ୍ୟାନୁଷ୍ଠାନ ନେବା ପୂର୍ବରୁ 2ଜଣ ଇସ୍ତଫା ଦେଇ ଥିବା କହିଛନ୍ତି ଜିଲ୍ଲା ଶିକ୍ଷାଧିକାରୀ ସନାତନ ପଣ୍ଡା।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
