ଭଞ୍ଜନଗର: ରାଜ୍ୟରେ ଧାନ କିଣା ଆରମ୍ଭରୁ ହିଁ ମଣ୍ଡି ସମସ୍ୟା ଲାଗି ରହିଛି । ଯାହାକୁ ନେଇ ବିଭିନ୍ନ ସ୍ଥାନରେ ଚାଷୀ ଆନ୍ଦୋଳନ ମୁଣ୍ଡ ଟେକିଛି । ସମାନ ସମସ୍ୟା ନେଇ ଗଞ୍ଜାମ ଜିଲ୍ଲା ବେଲଗୁଣ୍ଠା ତହସିଲ ଅଧିନ ବିଛଣା ଗାଁ ଛକରେ ଶତାଧିକ ଚାଷୀ ପ୍ରଚଣ୍ଡ ଖରାରେ ଆସିକା-ଭଞ୍ଜନଗର ମୁଖ୍ୟ ରାସ୍ତା ଅବରୋଧ କରିଛନ୍ତି ।
ଚାଷୀଙ୍କ ଅଭିଯୋଗ ମୁତାବକ, ଦୀର୍ଘ ଦିନ ହେଲା ସେମାନେ ଟୋକନ ପାଇଥିଲେ ମଧ୍ୟ ମଣ୍ଡିରୁ ସେମାନଙ୍କ ଧାନ ଉଠି ପାରୁନି । ଅନେକ ଚାଷୀଙ୍କ ଧାନ ଏବେ ବି ଖଳାରେ ପଡିରହିଛି । ଧାନ ବିକ୍ରି ହୋଇ ନପାରିବାରୁ ସେମାନେ ମୂଲିଆଙ୍କ ମଜୁରୀ ମଧ୍ୟ ଦେଇ ପାରୁନାହାନ୍ତି । ଏନେଇ ସ୍ଥାନୀୟ ପ୍ରଶାସନଙ୍କୁ ବାରମ୍ବାର ଜଣାଇବା ପରେ ବି କୌଣସି ସମାଧାନର ବାଟ ଫିଟି ପାରିନି । ଯାହାଦ୍ବାରା ଉପାୟ ଶୂନ୍ୟ ଚାଷୀ ଶେଷରେ ଧାନ ବସ୍ତା ରଖି ରାସ୍ତା ଅବରୋଧ କରିଛନ୍ତି ।
ରାସ୍ତାରୋକ ପାଇଁ ଉଭୟ ପାର୍ଶ୍ବରେ ଦୀର୍ଘ ସମୟ ଧରି ଗାଡି ମଟର ଅଟକ ରହିଛି । ଘଟଣାସ୍ଥଳରେ ଗାଙ୍ଗପୁର ପୋଲିସ, ତହସିଲଦାର ଏବଂ ବିଡିଓ ପହଞ୍ଚି ଉତ୍ୟକ୍ତ ଚାଷୀଙ୍କ ବୁଝାସୁଝା କରୁଛନ୍ତି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
