ବ୍ରହ୍ମପୁର: ବାଣ ଫୁଟାଇବା ବଦଳରେ ଆସ ଫୁଟାଇବା ହସ କାର୍ଯ୍ୟକ୍ରମ ସାମିଲ ହେଲେ ସବୁଜ ବାହିନୀ । ପ୍ରତ୍ୟେକ ବର୍ଷ ଭଳି ଚଳିତବର୍ଷ ମଧ୍ୟ ଆଲୋକର ପର୍ବ ଦୀପାବଳି ଅବସରରେ ସବୁଜ ବାହିନୀ ପକ୍ଷରୁ ଆମ୍ବଗଡ ନିକଟସ୍ଥ ଓମ୍ ଜରା ନିବାସ ଓ ବ୍ରହ୍ମପୁର ସହରରେ ରହିଥିବା ପ୍ରାଣୀ ଚିକିତ୍ସାଳୟ ପରିସରରେ ଆସ ଫୁଟାଇବା ହସ କାର୍ଯ୍ୟକ୍ରମ ପାଳିତ ହୋଇଯାଇଛି ।
ସ୍ୱଚ୍ଛ ଏବଂ ପ୍ରଦୂଷଣ ମୁକ୍ତ ଦୀପାବଳୀ ପାଳିବା ଅବସରରେ ପ୍ରାଣୀ ଚିକିତ୍ସାଳୟରେ ଗାଈ ମାନଙ୍କୁ ଗୋ-ଖାଦ୍ୟ ବଣ୍ଟନ, ବୃଦ୍ଧାଶ୍ରମରେ ବୃଦ୍ଧବୃଦ୍ଧା ମାନଙ୍କୁ ନୂତନ ବସ୍ତ୍ର ବଣ୍ଟନ, ସେମାନଙ୍କୁ ନିତ୍ୟ ବ୍ୟବହୃତ ଜିନିଷ ଯୋଗାଇ ସେମାନଙ୍କ ସହ ସମୟ ଅତିବାହିତ କରି ସେମାନଙ୍କ ଜୀବନରେ ଖୁସି ଆଣିବା ପାଇଁ ଛୋଟିଆ ପ୍ରୟାସଟିଏ କରାଯାଇଥିଲା । ଆତସବାଜି ଫୁଟାଇବା ଦ୍ୱାରା ବାୟୁ ପ୍ରଦୂଷଣ ହୋଇଥାଏ । ଶବ୍ଦ ପ୍ରଦୂଷଣ ହେବା ଦ୍ବାରା ବିଭିନ୍ନ ପଶୁ ପକ୍ଷୀମାନେ ଭୟରେ ମୃତ୍ୟୁବରଣ କରିଥାନ୍ତି । ସବୁଜ ବାହିନୀର ସଭାପତି ଶିବରାମ ପାଣିଗ୍ରାହୀଙ୍କ ନେତୃତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ସମାଜର ଭିନ୍ନ ଭିନ୍ନ ଲୋକମାନଙ୍କୁ ଯୋଡିବା ଓ ସଚେତନ କରିବା ଏହି କାର୍ଯ୍ୟକ୍ରମର ମୂଳ ଉଦ୍ଦେଶ୍ୟ ବୋଲି କୁହାଯାଇଛି ।
ସେହିପରି ସହରର ସାତ୍ତ୍ୱିକ ସୋଲ ଫାଉଣ୍ଡେସନ ବ୍ରହ୍ମପୁର ଟିମ୍ ତରଫରୁ ଗୁଣାତ୍ମକ ଶିକ୍ଷା ଏବଂ ଦିଆ ଫୋର ଚେଞ୍ଜ ପାଇଁ ଏକ କାର୍ଯ୍ୟକ୍ରମ ଗୁଡସେଡ୍ ରୋଡ ସ୍ଥିତ ବସ୍ତି ଠାରେ ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ବସ୍ତିବାସିନ୍ଦାଙ୍କ ଶିଶୁ ଓ ବିଦ୍ୟାର୍ଥୀଙ୍କ ମଧ୍ୟରେ ବିଭିନ୍ନ ପ୍ରକାର ପ୍ରତିଯୋଗିତାମୂଳକ କାର୍ଯ୍ୟକ୍ରମ କରାଯାଇ ପୁରସ୍କାର ବିତରଣ କରାଯାଇଥିଲା । କିଛି କାର୍ଯ୍ୟକଳାପ ମାଧ୍ୟମରେ ବିଦ୍ୟାର୍ଥୀଙ୍କ ମଧ୍ୟରେ ପାଠ ପଢିବା ପ୍ରତି ଉତ୍ସାହିତ କରାଯାଇଥିଲା । ଶେଷରେ ବର୍ଣ୍ଣବୋଧ ପୁସ୍ତକ, ମିଠା, ବିସ୍କୁଟ, କେକ୍ ସହ ପୋଷାକ ପତ୍ର ବଣ୍ଟନ କରାଯାଇଥିଲା ।
ଇଟିଭି ଭାରତ, ବ୍ରହ୍ମପୁର
