ବ୍ରହ୍ମପୁର: କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରାଳୟରେ ୧୬୦ଟି ଅନୁସୂଚିତ ଜାତି ଓ ଜନଜାତି ଗୋଷ୍ଠୀକୁ ଦେଶରେ ମିଳିପାରୁ ନାହିଁ ସରକାରୀ ସ୍ୱୀକୃତି । ଏପରିକି ଆମ ରାଜ୍ୟରେ ରହିଥିବା ଏହି ବର୍ଗକୁ ଜନଜାତି ତାଲିକାରେ ସ୍ଥାନ ଦେବାକୁ ଗତ କିଛିବର୍ଷ ଧରି ରାଜ୍ୟ ସରକାରଙ୍କ ପକ୍ଷରୁ କେନ୍ଦ୍ରକୁ ଅନୁରୋଧ କରାଯାଉଛି । ହେଲେ ଅଦ୍ୟାବିଧି କେନ୍ଦ୍ର କ୍ୟାବିନେଟରେ ଓଡିଶା ପ୍ରସ୍ତାବକୁ ଗୃହୀତ କରାଯାଇ ନାହିଁ । ଯାହାକି ଓଡିଶାର ଜନଜାତି ସାମ୍ୱିଧାନିକ ଧାରା ୨୧ରେ ରହିଥିବା ମୌଳିକ ଅଧିକାର କ୍ଷୁର୍ଣ୍ଣ କରୁଥିବା ଦର୍ଶାଇ ଜାତୀୟ ମାନବାଧିକାର କମିଶନରେ ଅଭିଯୋଗ କରିଛନ୍ତି ବ୍ରହ୍ମପୁର ମାନବାଧିକାର କର୍ମୀ ରବୀନ୍ଦ୍ର କୁମାର ମିଶ୍ର ।
ଯୋଡଆ, ସଅର, କୁଡୁମୀ, କୁଲି ଭଳି ଏସବୁ ଜନଜାତିକୁ ଆଦିବାସୀ ଗୋଷ୍ଠୀରେ ମିଶାଇବାକୁ ୧୯୭୮ରୁ ପ୍ରୟାସ ଜାରି ରହିଛି । ହେଲେ ଏଯାଏଁ କୌଣସି ସଫଳତା ମିଳିପାରି ନଥିବା ନେଇ ମାନବାଧିକାର କର୍ମୀ ଅସନ୍ତୋଷ ପ୍ରକାଶ କରିଛନ୍ତି । ଏହି ୧୬୦ ଗୋଷ୍ଠୀର ଜନସଂଖ୍ୟା ପାଖାପାଖି ୫୦ ଲକ୍ଷ ବୋଲି ସେ ଜାତୀୟ ମାନବାଧିକାର କମିଶନରେ ଅଭିଯୋଗ ପତ୍ରରେ ଦର୍ଶାଇଛନ୍ତି ।
ଇଟିଭି ଭାରତ, ବ୍ରହ୍ମପୁର
