ଭଞ୍ଜନଗର: ଅବ୍ୟବସ୍ଥା ଘେରରେ କସାଂରୀ ସାହି । ମୁକୁଳା ପଡିଛି ଡ୍ରେନ । ଅସରାଏ ବର୍ଷା ହେଲେ ନାହିଁ ନଥିବା ଅସୁବିଧା ଭୋଗୁଛନ୍ତି ସାହି ବାସିନ୍ଦା ।
ଗଞ୍ଜାମ ଜିଲ୍ଲା ବେଲଗୁଣ୍ଠା ଏନଏସିର କସାଂରୀ ସାହିରେ ଦୀର୍ଘଦିନ ହେଲା ଡ୍ରେନଟି ବ୍ଲକ ହୋଇଯାଇଥିଲା । ଅସରାଏ ବର୍ଷା ହେଲେ ମଇଳା ପାଣି ଘରେ ପଶୁଥିଲା ତ ରାସ୍ତାରେ ଭାସୁଥିଲା । ଆଉ ଦୁର୍ଗନ୍ଧରେ ନାକ ଫାଟିଯାଉଥିଲା । ବାରମ୍ବାର ଏନଏସିରେ ଅଭିଯୋଗ ପରେ ପୂର୍ତ୍ତ ବିଭାଗ ଡ୍ରେନଟିକୁ ଭାଙ୍ଗିଦେଇଛି କିନ୍ତୁ ଡ୍ରେନଟିର ପୁନଃରୁଦ୍ଧାର ହୋଇପାରିନାହିଁ । ରାସ୍ତା ଉପରେ ପଥର ଓ ବଡ ବଡ କଂକ୍ରିଟ ପଡି ରହିଛି ।
ଫଳରେ ସେହି ରାସ୍ତା ଦେଇ ଯାଉଥିବା 4ଟି ୱାର୍ଡର ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ସାହି ବାସିନ୍ଦା ଏନଏସି ଅଫିସ ଦୌଡୁଛନ୍ତି । କେହି ଗୁହାରି ଶୁଣୁ ନାହାନ୍ତି କି ମରାମତିର ନା ଧରୁନାହାନ୍ତି । କିଛିଦିନ ତଳେ ଉପଜିଲ୍ଲାପାଳ ଆସି ଦେଖିକି ଯାଇଥିଲେ । ଅତି ଶୀଘ୍ର କାମହେବ ବୋଲି ପ୍ରତିଶୃତି ଦେଇ ମଧ୍ୟ ଯାଇଥିଲେ । କିନ୍ତୁ ସେ ବି ପ୍ରତିଶୃତିରେ ହିଁ ରହିଗଲା । ବେଲଗୁଣ୍ଠା ଏନଏସି ଦୁର୍ନୀତିରେ ବୁଡିରହିଥିବା ବେଳେ ଡ୍ରେନଟି କେବେହେବ ତାହା ଅନିଶ୍ଚିତତା ଭିତରକୁ ଠେଲି ହୋଇଯାଇଛି । ଅତି ଶୀଘ୍ର ଡ୍ରେନ ତିଆରି ନହେଲେ ରାଜରାସ୍ତାକୁ ଓଲ୍ଲାଇବାକୁ ସାହି ବାସିନ୍ଦା ଚେତାବନୀ ଦେଇଛନ୍ତି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
