ଭଞ୍ଜନଗର: ଆଦିବାସୀଙ୍କ ପାଇଁ ସରକାରଙ୍କ ଅନେକ ଯୋଜନା । ମାତ୍ର ଏହି ଯୋଜନା ସବୁ ସାତସପନ ପାଲଟିଛି ଗଞ୍ଜାମ ଜିଲ୍ଲା ପୋଲସରା ବ୍ଲକ ମାଳତେନ୍ତୁଳିଆ ପଞ୍ଚାୟତର ଆମ୍ବଖାଲ ଗ୍ରାମରେ ।
ଗାଁ ରେ ନାହିଁ ଅଙ୍ଗନବାଡି କେନ୍ଦ୍ର । ଯେଉଁ କାରଣରୁ କୁନିକୁନି ପିଲାମାନେ ଅପପୁଷ୍ଟିର ଶିକାର ହେଉଛନ୍ତି । ରାଜ୍ୟ ସରକାର ଯୋଗାଇ ଦେଉଥିବା ଅଣ୍ଡା, ଛତୁଆ ଭଳି ପୁଷ୍ଟିକର ଖାଦ୍ୟ ଏହି ଆଦିବାସୀ ଅଞ୍ଚଳରେ ନପହଞ୍ଚିବା ସହ ପିଲାମାନେ ସରକାର ଯୋଗାଉଥିବା ଡ୍ରେସରୁ ମଧ୍ୟ ବଞ୍ଚିତ ହେଉଛନ୍ତି । ତେଣୁ ଗ୍ରାମରେ ଏକ ଅଙ୍ଗନବାଡି କେନ୍ଦ୍ର ଖୋଲିବାକୁ ଗ୍ରାମବାସୀ ଦାବି କରିଛନ୍ତି । ଅଙ୍ଗନବାଡିଟିଏ ନଥିବାରୁ କୁନିକୁନି ପିଲା ଶାରୀରିକ ଓ ମାନସିକ ସ୍ଥରରେ ଦୁର୍ବଳ ହୋଇପଡୁଛନ୍ତି ।
ଏନେଇ ଆମ୍ବଖାଲ ଗ୍ରାମର ସମସ୍ୟା ବିଷୟରେ ଭିଜିଟରେ ଆସିଥିବା ଗଞ୍ଜାମ ପ୍ରକଳ୍ପ ନିର୍ଦ୍ଦେଶକ ସିଦ୍ଧାର୍ଥ କୁମାର ସ୍ବାଇଁଙ୍କୁ ପଚାରିବାରୁ ସେ କହିଛନ୍ତି ସେହି ଗ୍ରାମ ପାଇଁ ଅଙ୍ଗନବାଡି କର୍ମୀ ନିଯୁକ୍ତି ହୋଇଛନ୍ତି କିନ୍ତୁ ସେଠାରେ ଅଙ୍ଗନବାଡି କେନ୍ଦ୍ର ନଥିବାରୁ ସରକାରଙ୍କ ଦ୍ବାରା ଆସୁଥିବା ପୁଷ୍ଟିକର ଖାଦ୍ୟ ଏବଂ ଅନ୍ୟାନ୍ୟ ଆନୁଷଙ୍ଗିକ ଜିନିଷ ପହଁଞ୍ଚି ପାରୁନାହିଁ । ତେଣୁ ଅତିଶ୍ରୀଘ୍ର ସେଠାରେ ଅଙ୍ଗନବାଡି କେନ୍ଦ୍ର ହେବା ସହିତ ପିଲାମାନେ ସମସ୍ତ ସରକାରୀ ସୁବିଧା ପାଇବେ ବୋଲି ସେ କହିଛନ୍ତି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
