ବ୍ରହ୍ମପୁର: ଥାନା ସମ୍ମୁଖରେ ଯୁବକଙ୍କ ଆତ୍ମାହୁତି ଉଦ୍ୟମ । ବାପାଙ୍କ ହତ୍ୟାକାଣ୍ଡ ମାମଲାରେ ଯୁବକଙ୍କୁ ନ୍ୟାୟ ପ୍ରଦାନ କରାଯାଉନଥିବା ଅଭିଯୋଗରେ ଏଭଳି କରିଛନ୍ତି ଯୁବକ । ଯୁବକଙ୍କ ଆତ୍ମାହୁତି ଉଦ୍ୟମ ବେଳେ ପୋଲିସ ତାଙ୍କୁ ଅଟକ ରଖିଛି । ତେବେ ଗଞ୍ଜାମ ଜିଲ୍ଲା ବ୍ରହ୍ମପୁରରେ ଏଭଳି ଏକ ଘଟଣା ଦେଖିବାକୁ ମିଳିଛି ।
ତେବେ ବ୍ରହ୍ମପୁର ସହରର ଆମ୍ୱପୁଆ ବସନ୍ତ ବିହାର ଅଞ୍ଚଳର ପ୍ରଶାନ୍ତ ସେଠୀ ନାମକ ଯୁବକ ଜଣଙ୍କ ଆଜି ମଧ୍ୟାହ୍ନରେ ବ୍ରହ୍ମପୁର ଜିଲ୍ଲା ପୋଲିସ ମୁଖ୍ୟାଳୟକୁ ଅଭିଯୋଗ କରିବାକୁ ଯାଇଥିଲେ । ସେଠାରେ ଯୁବକ ନିଜ ଦେହରେ କିରୋସିନୀ ଢାଳି ହୋଇ ଆତ୍ମାହୁତି କରିବାକୁ ଉଦ୍ୟମ କରୁଥିବା ବେଳେ ପୋଲିସ କର୍ମୀ ଯୁବକଙ୍କୁ ଧରିବା ସହିତ ସହରର ବୈଦ୍ୟନାଥପୁର ଥାନାରେ ଅଟକ ରଖିଛନ୍ତି । ଏହି ଘଟଣାରେ ଏକ ମାମଲା ରୁଜ କରି ଏହାର ତଦନ୍ତ ଆରମ୍ଭ ହୋଇଛି ।
ଏହା ମଧ୍ୟ ପଢ଼ନ୍ତୁ...Student Protest in DU: ବିଶ୍ବବିଦ୍ୟାଳୟ ଖୋଲିବା ଦାବିରେ ଛାତ୍ରଙ୍କ ଆତ୍ମାହୁତି ଉଦ୍ୟମ
ସୂଚନା ଅନୁସାରେ, 2021 ମସିହାରେ ପ୍ରଶାନ୍ତ ସେଠୀଙ୍କ ପିତାଙ୍କୁ ହତ୍ୟା କରାଯାଇଥିଲା । ଏହାକୁ ନେଇ ସଦରଥାନାରେ ଏକ ମାମଲା ରୁଜ ହୋଇଥିଲା । ହେଲେ ହତ୍ୟା ଅଭିଯୋଗରେ ଗିରଫ ହୋଇଥିବା 5 ଜଣ ଅଭିଯୁକ୍ତମାନଙ୍କ ମଧ୍ୟରୁ ଦୁଇ ଜଣ ହାଇକୋର୍ଟର ଆଶ୍ରୟ ନେଇ ଜାମିନ ପାଇଥିବା ବେଳେ ସେମାନଙ୍କ ଜାମିନଙ୍କୁ ନାମାଞ୍ଜୁର କରିବା ପାଇଁ ପ୍ରଶାନ୍ତ ଉଚ୍ଚ ନ୍ୟାୟଳୟରେ ଆଶ୍ରୟ ନେଇଥିଲେ । ସେପଟେ ଉକ୍ତ ମାମଲାରେ ପୋଲିସ ପକ୍ଷରୁ ଗଞ୍ଜାମ ଜିଲ୍ଲା ଜର୍ଜ କୋର୍ଟରେ ଫାଇନାଲ ଚାର୍ଜସିଟ୍ ଦାଖଲ କରିଥିବା ବେଳେ ଏହାର ବିଚାର ପ୍ରକ୍ରିୟା ମଧ୍ୟ ଆରମ୍ଭ ହୋଇଯାଇଛି । ଆଉ ଏଭଳି ସମୟରେ ନିଜ ବାପାର ହତ୍ୟା ଘଟଣାରେ ଅନ୍ୟ ଦୁଇ ଜଣ ମଧ୍ୟ ସଂପୃକ୍ତ ରହିଥିବା ବେଳେ ସେମାନଙ୍କୁ ଏପର୍ଯ୍ୟନ୍ତ ଗିରଫ କରାଯାଇନଥିବା ନେଇ ପ୍ରଶାନ୍ତଙ୍କ ପକ୍ଷରୁ ପୋଲିସ ଅଧିକାରୀଙ୍କୁ ଅବଗତ କରିଥିଲେ । ତେବେ ତାଙ୍କୁ କୋର୍ଟରେ ବିଚାର ପ୍ରକ୍ରିୟା ଆରମ୍ଭ ହୋଇଥିବା ଯୋଗୁଁ ପ୍ରକୃତ ଫୋରମ୍ରେ ଆସିବା ପାଇଁ ପୋଲିସ ତରଫରୁ ପରାମର୍ଶ ଦିଆଯାଇଥିଲା ।
ତେବେ ସୋମବାର ଦିନ ପ୍ରଶାନ୍ତ ବ୍ରହ୍ମପୁର ଆରକ୍ଷୀ ଅଧିକ୍ଷକଙ୍କ କାର୍ଯ୍ୟାଳୟ ଗେଟ୍ ପାଖକୁ ଆସି ନିଜ ଦେହରେ କିରୋସିନ୍ ଢ଼ାଳି ଆତ୍ମାହୃତି ଦେବା ପାଇଁ ଉଦ୍ୟମ କରୁଥିଲେ । ବୈଦ୍ୟନାଥପୁର ଥାନା ପୋଲିସ ପ୍ରଶାନ୍ତଙ୍କୁ ଅଟକ ରଖିବା ସହିତ ଏହି ଘଟଣାରେ ଏକ ମାମଲା ରୁଜ କରି ଏହାର ତଦନ୍ତ ଆରମ୍ଭ କରିଥିବା ବ୍ରହ୍ମପୁର ଆରକ୍ଷୀ ଅଧିକ୍ଷକ ସୂଚନା ଦେଇଛନ୍ତି ।
ଇଟିଭି ଭାରତ, ବ୍ରହ୍ମପୁର
