ଭଞ୍ଜନଗର: ଗଞ୍ଜାମ ଖଲିକୋଟ ରେଞ୍ଜ ଅଧିନ ବେଗୁନିଆପଡାର ଗୁରୁଝରି ଗାଁର ବାଇଆ ମୁଦୁଲିଙ୍କ କୁମ୍ଭାର ଶାଳରୁ ଉଦ୍ଧାର ହେଲା ଏକ 9 ଫୁଟର ଅହିରାଜ ସାପ । ତେବେ ଗତକାଲି ବିଳମ୍ବିତ ରାତିରେ ଏକ ଅହିରାଜ ସାପ ବାଇଆଙ୍କ କୁମ୍ଭାର ଶାଳରେ ପଶିଯାଇଥିଲା । ଏ ନେଇ ବାଇଆ ସ୍ନେକ ହେଲ୍ପ ଲାଇନକୁ ଖବର ଦେବାରୁ ସ୍ନେକ ହେଲ୍ପ ଲାଇନ ସଦସ୍ୟ ସ୍ବପ୍ନାଲୋକ ମିଶ୍ର ଏବଂ ମିହିର ପଣ୍ଡା ଘଟଣାସ୍ଥଳରେ ପହଞ୍ଚି ସତର୍କତାର ସହ ସାପଟିକୁ ଉଦ୍ଧାର କରିଥିଲେ । ଏବଂ ସ୍ଥାନୀୟ ବନ ବିଭାଗ କର୍ମଚାରୀଙ୍କ ଉପସ୍ଥିତିରେ ସାପକୁ ଜଙ୍ଗଲରେ ଛାଡି ଦିଆଯାଇଥିଲା ।
ତେବେ ଗ୍ରାମବାସୀମାନେ ଘର ବାହାରକୁ ସାପକୁ ଆଣି ସେମାନଙ୍କ ଆଗରେ ପ୍ରଦର୍ଶନ କରିବାକୁ ଦାବି କରିଥିଲେ । କିନ୍ତୁ ସ୍ନେକ ହେଲ୍ପ ଲାଇନ ସଦସ୍ୟ ସ୍ବପ୍ନାଲୋକ ସୁରକ୍ଷା ପ୍ରୋଟୋକଲର ଦ୍ବାହି ଦେଇ ଲୋକମାନଙ୍କ କଥାକୁ କର୍ଣ୍ଣପାତ ହିଁ କରି ନଥିଲେ ।
ଅହିରାଜ ସାପର ବିଷ ନ୍ୟୁରୋଟକ୍ସିକ । ଏହି ସାପ କାମୁଡ଼ିଲେ ମୃତ୍ୟୁ ସୁନିଶ୍ଚିତ । କାରଣ ଆମ ଦେଶରେ ଅହିରାଜ ସାପ ବିଷର ଆଣ୍ଟି ଭେନମ ଉପଲବ୍ଧ ନାହିଁ ବୋଲି କହିଛନ୍ତି ସ୍ନେକ ହେଲ୍ପ ଲାଇନ ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
