ଗଜପତି: ସିଲ୍ ହେଲା ଗଜପତି ସହରର ନର୍ସିଂହୋମ । ଏକ ଘରୋଇ ନର୍ସିଂହୋମର କର୍ମଚାରୀ କୋରୋନା ପଜେଟିଭ ଚିହ୍ନଟ ହେବା ପରେ ପ୍ରଶାସନ ପକ୍ଷରୁ ନର୍ସିଂହୋମକୁ ୭ ଦିନ ପାଇଁ ସିଲ୍ କରାଯାଇଛି । ଏହି ନର୍ସିଂହୋମର ଡାକ୍ତରଙ୍କ ତୁରନ୍ତ ସ୍ବାବ ସଂଗ୍ରହ କରାଯିବା ପାଇଁ ପଦକ୍ଷେପ ନେବା ସହ ଚିହ୍ନଟ ହୋଇଥିବା ନିର୍ସିଂହୋମ କର୍ମଚାରୀଙ୍କ ସଂସ୍ପର୍ଶରେ କେଉଁମାନେ ଆସିଛନ୍ତି, ସେନେଇ ମଧ୍ୟ ଯାଞ୍ଚ କରାଯାଉଥିବା ସିଡିଏମଓ ଡ.ପ୍ରଦୀପ କୁମାର ପାତ୍ର କହିଛନ୍ତି ।
ଗଜପତି ଜିଲ୍ଲାରେ ଆଜି(ସୋମବାର) ୭ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେଥିମଧ୍ୟରୁ ପାରଳାଖେମୁଣ୍ଡି ସହର ୫ଜଣ ରହିଥିବା ବେଳେ ଗୁମ୍ମା ଏବଂ କାଶୀନଗର ବ୍ଲକର ଜଣେ ଲେଖାଏଁ ରହିଛନ୍ତି । ତେବେ ପାରଳାଖେମୁଣ୍ଡି ସହରର ୫ ଜଣଙ୍କ ମଧ୍ୟରୁ ୩ଜଣ ପୂର୍ବରୁ ଚିହ୍ନଟ ହୋଇଥିବା ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତି ହୋଇଥିବା ବେଳେ ୨ ଜଣ କଣ୍ଟେନମେଣ୍ଟ ଅଞ୍ଚଳର ବୋଲି ପ୍ରଶାସନ ସଷ୍ଟ କରିଛି ।
ପୂର୍ବରୁ ଚିହ୍ନଟ ହୋଇଥିବା ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ୩ଜଣ ସହରର ଏକ ଘରୋଇ ସୌମ୍ୟ ନର୍ସିଂହୋମର କର୍ମଚାରୀ ହୋଇଥିବା ଯୋଗୁଁ ପ୍ରଶାସନ ପକ୍ଷରୁ ଆଜି ଏହାକୁ ୭ ଦିନ ପାଇଁ ସିଲ୍ କରାଯାଇଛି ।
ସେହିଭଳି ସହରରେ ଥିବା ଅନ୍ୟ ନର୍ସିଂହୋମ ଗୁଡିକ ମଧ୍ୟ ଯାଞ୍ଚ କରାଯିବା ସହ ସେମାନେ କୋଭିଡ ଲକ୍ଷଣ ଥିବା ରୋଗୀଙ୍କୁ ନର୍ସିଂହୋମରେ ରଖିବା ପୂର୍ବରୁ ତୁରନ୍ତ ଖବର ଦେବାକୁ ନିର୍ଦ୍ଦେଶ ଜାରି କରାଯାଇଥିବା ସିଡିଏମଓ ସୂଚନା ଦେଇଛନ୍ତି । ସେହିଭଳି ନର୍ସିଂହୋମଗୁଡିକର କୋରୋନା ମୁକାବିଲା ପାଇଁ କିଭଳି ପଦକ୍ଷେପ ଗ୍ରହଣ କରୁଛନ୍ତି ତାହାର ମଧ୍ୟ ଯାଞ୍ଚ କରାଯାଉଥିବା ସେ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
