ଗଜପତି: ମାସେ କି ଦୁଇ ମାସ ନୁହେଁ ବର୍ଷ ବର୍ଷ ଧରି ଅଧା ହୋଇ ପଡିରହିଛି ରାସ୍ତା କାମ । ଏ ହେଉଛି ପାରଳାଖେମୁଣ୍ଡି ସହରର ମୁଖ୍ୟ ରାସ୍ତାର ଦୃଶ୍ୟ । ଯେଉଁଠାରେ ଉନ୍ନତିକରଣ କାର୍ଯ୍ୟ ନାମରେ ବର୍ଷ ବର୍ଷ ଧରି ଚାଲିଛି ପ୍ରହସନ । କେଉଁଠି ଦୁଇ ବର୍ଷ ତ କେଉଁଠି 4 ବର୍ଷ ହେବ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଥିବା ବେଳେ ଆଜି ଯାଏଁ ତାହା ସରିବାର ନାମ ନେଉ ନାହିଁ । ସେପେଟେ ଏହି ଅଧପନ୍ତରିଆ ରାସ୍ତା କାମ ପାଇଁ ସାଧାରଣ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି ।
ରାସ୍ତାରେ ଅଧା କାମ ଓ ଯେତିକି କାମ ହୋଇଛି ତାହା ନିମ୍ନମାନର ହୋଇଥିବାରୁ କେଉଁଠି ପରସ୍ତ ପରସ୍ତ ହୋଇ ସିମେଣ୍ଟ ଛାଡୁଛି ତ କେଉଁଠି ପୁଣି କଂକ୍ରିଟ ରାସ୍ତାରୁ ରଡ ବାହାରି ଲୋକେ କ୍ଷତାକ୍ତ ହେଉଛନ୍ତି । ପାରଳାଖେମୁଣ୍ଡି ସହରର ଫରେଷ୍ଟ ଗେଟଠାରୁ ଆରମ୍ଭ କରି ବସଷ୍ଟାଣ୍ଡ ପର୍ଯ୍ୟନ୍ତ ଗତ 4 ବର୍ଷ ହେବ ଓ କୋର୍ଟ ଛକଠାରୁ ଆରମ୍ଭ କରି ଥାନା ଛକ ପର୍ଯ୍ୟନ୍ତ ଗତ 2 ବର୍ଷ ହେବ ତାଲିଛି ରାସ୍ତା ଉନ୍ନତିକରଣ କାର୍ଯ୍ୟ । ହେଲେ ରାସ୍ତା କାମ ଶେଷ ହେବା ବଦଳରେ ଦିନ ଗଡିଚାଲିଛି ଓ କାମ ଯେମିତି ସେମିତି ପଡି ରହିଛି ।
ତେବେ ଗଜପତି ଜିଲ୍ଲା ସଦର ମହକୁମାରେ ପ୍ରଶାସନର ନାକ ତଳେ ଏପରି କାର୍ଯ୍ୟ ଚାଲୁଥିବା ବେଳେ ସମସ୍ତ ଅଧିକାରୀଙ୍କ ନୀରବତା ସେମାନଙ୍କ ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଏମିତିରେ ଗ୍ରାମାଞ୍ଚଳମାନଙ୍କରେ ରାସ୍ତା କାମ କଥା ନ କହିବା ଭଲ । ତେବେ ସାଧାରଣ ଲୋକେ ଏହା ମଧ୍ୟ ଅଭିଯୋଗ କରିଛନ୍ତି କି ସହରରେ ଥିବା ଦୁଇ ମୁଖ୍ୟ ରାସ୍ତାର ଅବସ୍ଥା ଏତେ ଖରାପ ନହୋଇଥିଲେ ବି ସେଥିରେ ଦୋହରା କାମ କାହିଁକି ହେଉଛି । ଏମିତିରେ ବର୍ଷାଦିନ ଆସିବାରୁ ରାସ୍ତାରେ ପାଣି ଜମି ଦିନକୁ ଦିନ ଦୁର୍ଘଟଣାର ମାତ୍ରା ବି ବଢିବାରେ ଲାଗିଛି ।
ଏନେଇ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀଙ୍କପ ପଚରା ଯିବାରୁ ଚିରାଚରିତ ଢଙ୍ଗରେ ପ୍ରସଙ୍ଗକୁ ଏଡାଇ ଯାଇଥିଲେ ସେ । ଶାନ୍ତିପ୍ରିୟ ଗଜପତିବାସୀଙ୍କ ନୀରବତାର ଲାଭ ଉଠାଇ ରାସ୍ତା କାମରେ ଏପରି ଅବହେଳା ହେଉଥିବା ଲୋକେ ଅଭିଯୋଗ କରିଛନ୍ତି । ତେଣୁ ଯଦି ଏ ଦିଗରେ ତୁରନ୍ତ କୌଣସି ପଦକ୍ଷେପ ନନିଆଯାଏ ତେବେ ଲୋକେ ଆନ୍ଦୋଳନକୁ ଓହ୍ଲାଇବେ ବୋଲି କଡା ଚେତାବନୀ ଦେଇଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
