ଗଜପତି: ଅଣସରର ଦୀର୍ଘ ୧୫ଦିନ ପରେ ବୁଧବାର ନବଯୌବନ ବେଶରେ ଦର୍ଶନ ଦେଇଛନ୍ତି ପ୍ରଭୁ କାଳିଆ ଠାକୁର । ଦିନକ ପରେ ଠାକୁର ନବଦିନାତ୍ମକ ଯାତ୍ରାରେ ବାହାରିବେ । ଏଥିପାଇଁ ପାରଳାଖେମୁଣ୍ଡି ସମେତ ଗଜପତି ଜିଲ୍ଲାର ଜଗନ୍ନାଥ ମନ୍ଦିର ଥିବା ବିଭିନ୍ନ ସ୍ଥାନରେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ବିଶେଷ କରି ଦ୍ବିତୀୟ ପୁରୀ ଭାବେ ପରିଚିତ ପାରଳାଖେମୁଣ୍ଡିରେ ରଥଯାତ୍ରା ପାଇଁ ବ୍ୟାପକ ପ୍ରସ୍ତୁତି କରାଯାଇଛି ।
ଘୋଷଯାତ୍ରା ପାଇଁ ସଜେଇ ହେଉଛି ପାରଳା ବଡ଼ଦାଣ୍ଡ । ପୌରପରିଷଦ ପକ୍ଷରୁ ବଡ଼ଦାଣ୍ଡରେ ବିଭିନ୍ନ ପ୍ରକାର ଝୋଟି ଅଙ୍କାଯାଇ ବଡଦାଣ୍ଡକୁ ସୁନ୍ଦର କରାଯାଇଛି । ରଥ ଟାଣିବାକୁ ନେଇ ସ୍ଥାନୀୟ ଲୋକେ ଖୁବ ଉତ୍ସାହିତ ଅଛନ୍ତି । କୋରୋନା କଟକଣା ପାଇଁ ଗତ ଦୁଇ ବର୍ଷ ବିନା ଭକ୍ତରେ କେବଳ ରୀତିନୀତି ମଧ୍ୟରେ ରଥ ଟଣାଯାଇଥିଲା । ଚଳିତ ବର୍ଷ କଟକଣା ହଟିଥିବାରୁ ବେଶ୍ ଉତ୍ସାହିତ ଅଛନ୍ତି ସ୍ଥାନୀୟ ବାସିନ୍ଦା । ଦୀର୍ଘ ଦୁଇ ବର୍ଷ ପରେ ମହାପ୍ରଭୁଙ୍କ ରଥ ଗଡିବା ସହ ଗୁଣ୍ଡିଚା ମନ୍ଦିରରେ ଠାକୁରଙ୍କ ଦର୍ଶନ କରିବା ପାଇଁ ଚାତକ ପରି ଚାହିଁ ରହିଛି ଭକ୍ତ । ଯାତ୍ରା ପାଇଁ 3ରଥ ପ୍ରସ୍ତୁତ ହୋଇ ସାରିଥିବାବେଳେ ବୁଧବାର ରଥକୁ ନୀଲବକୁ ବିଜେ ମଧ୍ୟ ହୋଇସାରିଛନ୍ତି ।
ସେପଟେ ଏହାକୁ ଆହୁରି ଆକର୍ଷଣୀୟ କରିବା ପାଇଁ ବଡଦାଣ୍ଡରେ ଝୋଟି ଅଙ୍କାଯାଇଛି । ମନ୍ଦିର ନିକଟ ରାସ୍ତାରେ ରଙ୍ଗ କାମ କରିବା ସହ ଏହା ଉପରେ ନାନା ପ୍ରକାର ଝୋଟି ଆଙ୍କାଯାଇଛି । ଝୋଟି ଏତେ ଆକର୍ଷଣୀୟ ହୋଇଛି ଯେ, ପ୍ରତ୍ୟେକ ଦିନ ଏଠାରେ ହଜାର ହଜାର ଲୋକଙ୍କ ସମାଗମ ହେଉଛି । କେବଳ ଏହି ଗୋଟିଏ ସ୍ଥାନରେ ନୁହେଁ, ବଡଦାଣ୍ଡର ବିଭିନ୍ନ ସ୍ଥାନରେ ଝୋଟି ଅଙ୍କାଯାଇଛି । ପାରଳାଖେମୁଣ୍ଡି ରଥଯାତ୍ରା ଇତିହାସରେ ରାଜଦାଣ୍ଡରେ ଏଭଳି ଝୋଟି ଆଙ୍କିବା ପ୍ରଥମ ଘଟଣା । ତେଣୁ ପ୍ରଶାସନକୁ ଲୋକେ ସାଧୁବାଦ ଜଣାଇବା ସହ ଏହା ଚଳିତ ବର୍ଷର ମୁଖ୍ୟ ଆକର୍ଷଣ ବୋଲି କହିଛନ୍ତି ।
ଇଟିଭି ଭାରତ, ଗଜପତି
