କିଏ ଶୁଣିବ ମାନୁଏଲଙ୍କ ଦୁଃଖ ? ପାଠ ପଢାରେ ବାଧା ଦେଉଛି ଅଭାବ

ପଢିବାକୁ ଇଚ୍ଛା ଥିଲେ ବି ଆର୍ଥିକ ଅନଟନ ଭାଙ୍ଗି ଦେଉଛି ଅନାଥ ମାନୁଏଲଙ୍କ ମନୋବଳ । କଷ୍ଟେମଷ୍ଟେ ଯୁକ୍ତ ଦୁଇ ପାସ କରିଥିଲେ ମଧ୍ୟ ଉଚ୍ଚ ଶିକ୍ଷା ପାଇଁ ସରକାରଙ୍କ ସହାୟତାକୁ ଅପେକ୍ଷା କରିଛନ୍ତି ମାନୁଏଲ । ଅଧିକ ପଢନ୍ତୁ...

ପାରଳାଖେମୁଣ୍ଡି: କଥାରେ ଅଛି ଦୃଢ ଇଚ୍ଛାଶକ୍ତି ଏବଂ କଠିନ ପରିଶ୍ରମ ଯେକୌଣସି ପ୍ରତିବନ୍ଧକକୁ ମଧ୍ୟ ମାତ ଦେଇପାରେ । ଏହା କିଛି ମାତ୍ରାରେ ସତ ସାବ୍ୟସ୍ତ ମଧ୍ୟ ହୋଇଛି । ନିଜର ଦୃଢ ଇଚ୍ଛାଶକ୍ତି ଓ ମନୋବଳ ପାଇଁ ଜଣେ ବାପା ମା’ ଛେଉଣ୍ଡ ଆଦିବାସୀ ଛାତ୍ର ଯୁକ୍ତ ଦୁଇ ଯାଏ ପଢିସାରିଛନ୍ତି । ହେଲେ ପଇସା ନଥିବା କାରଣରୁ ଆଗକୁ କିପରି ପଢିବେ ସେନେଇ ଚିନ୍ତାରେ ରହିଛନ୍ତି ଗଜପତି ଜିଲ୍ଲା ଗୁମା ବ୍ଲକ ବଡକଳାକୋଟର ମାନୁଏଲ ରଇତ ।

ପେଟ ଖଣ୍ଡକ ପାଇଁ ବଡକଳାକୋଟ ଗାଁର ପିତର ରଇତ ଓ ତାଙ୍କ ପତ୍ନୀ ଗିରିଜାନୀ ଦାଦନ ଖଟିବାକୁ ଅରୁଣାଚଳ ପ୍ରଦେଶ ଯାଇଥିଲେ । ସେଠାରେ ହିଁ ମାନୁଏଲ ରଇତଙ୍କ ଜନ୍ମ । ତେବେ ହଠାତ୍ କୌଣସି କାରଣରୁ ସେଠାରେ ବାପା ପିତରଙ୍କ ମୃତ୍ୟୁ ହେବା ପରେ କଅଁଳା ପୁଅକୁ ଧରି ଗାଁକୁ ଫେରିବା ସହ ମୂଲ ଲାଗି ପୁଅକୁ ମଣିଷ କରିବା ପାଇଁ ପଣ କରିଥିଲେ ମା ଗିରିଜାନୀ ।

ପୁଅକୁ ଗାଁ ସ୍କୁଲରେ ନାମ ଲେଖାଇଥିଲେ । ମାନୁଏଲ ପିଲାଟି ବେଳରୁ ଭଲ ପାଠ ପଢୁଥିବାରୁ ସେ ଥିଲେ ସମସ୍ତଙ୍କ ଅତିପ୍ରିୟ । ହେଲେ ବିଧିର ବିଧାନ ଥିଲା କିଛି ଅଲଗା । ମାନୁଏଲ 8ମ ଶ୍ରେଣୀରେ ପଢୁଥିବାବେଳେ ମା’ ବି ଚିରନିଦ୍ରାରେ ଶୋଇଯାଇଥିଲେ । ଆଉ ଏକୁଟିଆ ହୋଇଯାଇଥିଲେ ମାନୁଏଲ ।

ଗୋଟିଏ ପଟେ ବାପା ମା’ ଛେଉଣ୍ଡ ଏବଂ ଅନ୍ୟପଟେ ଦାରିଦ୍ର୍ୟରେ ସେ ଭାଙ୍ଗି ପଡିଥିବାବେଳେ ପୁଣି ପାଠ ପଢିବାକୁ ମନ ବଳାଇଥିଲେ । ତାଙ୍କର ଆଗ୍ରହ ଦେଖି ସମ୍ପର୍କୀୟ ଓ ଗାଁ ଲୋକେ ତାଙ୍କୁ ସହାୟତା ମଧ୍ୟ କରିଥିଲେ । ପରେ ମାଟ୍ରିକ ପାସ କରି ଯୁକ୍ତ ଦୁଇରେ ପଢିଥିଲେ । ପାରଳାଖେମୁଣ୍ଡି ଏସ.କେ.ସି.ଜି କଲେଜରେ ପଢୁଥିବା ସମୟରେ ବିଭିନ୍ନ ଦୋକାନରେ କାମ କରି ନିଜର ସମସ୍ତ ଆବଶ୍ୟକତା ପୂରଣ କରୁଥିଲେ । ଶେଷରେ ଯୁକ୍ତ ଦୁଇ ମଧ୍ୟ ପାସ କରିଥିଲେ ।

ହେଲେ ଏବେ କୋରୋନା କଟକଣା ପାଇଁ ସେ ଗାଁରେ ରହୁଥିବାବେଳେ କିପରି ଆଗକୁ ପଢିବେ ସେନେଇ ଚିନ୍ତାରେ ରହିଛନ୍ତି । ଗାଁରେ ରହି ମନରେଗା କାମ କରି ନିଜେ ଖାଇବାକୁ ଯୋଗାଡ କରିଦେଉଛନ୍ତି ସତ ହେଲେ ଉଚ୍ଚ ଶିକ୍ଷା ପାଇଁ ଅର୍ଥ ଅଭାବରୁ ଚିନ୍ତାରେ ପଡିଯାଇଛନ୍ତି ।

ସମସ୍ତ ପ୍ରକାର ଅନୁକୂଳ ପରିବେଶ ସତ୍ତ୍ବେ ପିଲା ପାଠ ପଢିବାକୁ ଆଗ୍ରହ ପ୍ରକାଶ କରୁନଥିବାବେଳେ ବିଭିନ୍ନ ପ୍ରତିକୂଳ ପରିବେଶ ଥାଇ ବି ବଣପାହାଡ ଘେରା ଆଦିବାସୀ ଗାଁର ମାନୁଏଲଙ୍କ ପାଠ ପଢିବା ପ୍ରତି ଥିବା ଆଗ୍ରହ ସତରେ ପ୍ରେରଣାଦାୟୀ । ତେବେ ସରକାର ଯଦି ଏହି ଆଦିବାସୀ ଯୁବକ ପ୍ରତି ଧ୍ୟାନ ନଦିଅନ୍ତି ତେବେ ବଣ ମଲ୍ଲୀ ବଣରେ ଫୁଟି ଝାଉଁଳି ପଡିବା ସାର ହେବ ବୋଲି ଗାଁ ଲୋକେ କହିଛନ୍ତି ।

ସେପଟେ ଏପରି ଦୁର୍ଗମ ଅଞ୍ଚଳରୁ ଆସି ନିଜ ପ୍ରଚେଷ୍ଠାରେ ଯୁକ୍ତ ଦୁଇ ପାସ କରିଥିବା ଜାଣି ଗଜପତି ଜିଲ୍ଲାପାଳ ଖୁସି ହେବା ସହ ଖୁବଶୀଘ୍ର ଏକ ଟିମ ଗଠନ କରାଯାଇ ତାକୁ ସମସ୍ତ ସରକାରୀ ସହାୟତା ଦିଆଯିବ ବୋଲି କହିଛନ୍ତି । ତେବେ ଦେଖାଯାଉ ଜିଲ୍ଲାପାଳ ତାଙ୍କ ପ୍ରତିଶୃତି କେବେ ପାଳନ କରୁଛନ୍ତି ଏବଂ କେବେ ମାନୁଏଲ ଆଗକୁ ପଢିବାକୁ ସମର୍ଥ ହେଉଛି ।

(ବିଦ୍ର: ଆପଣ ଚାହିଁଲେ ମଧ୍ୟ ମାନୁଆଲଙ୍କୁ ନିମ୍ନଲିଖିତ ଠିକଣାରେ ସାହାର୍ଯ୍ୟ କରିପାରିବେ । ଠିକଣା- ମାନୁଏଲ ରଇତ, ପିତା -ସ୍ବର୍ଗତ ପିତର ରଇତ, ପୋଷ୍ଟ - ବଡକଳାକୋଟ, ଭାୟା - ଗୁମ୍ମା, ବ୍ଲକ- ଗୁମ୍ମା, ଜିଲ୍ଳା-ଗଜପତି, STATE BANK ACCOUNT NO - 35118090890, ଫୋନ — 8480545560)

ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ