ଗଜପତି: କୋରୋନା ଯୋଦ୍ଧାଙ୍କୁ ଉତ୍ସାହିତ କରିବା ପାଇଁ ସେମାନଙ୍କ କୋରୋନା ଜନିତ ମୃତ୍ୟୁ ପାଇଁ ଅନୁକମ୍ପା ମୂଳକ ରାଶି ରାଜ୍ୟ ସରକାର ଘୋଷଣା କରିଥିଲେ । ସେଥିରେ ସାମ୍ବାଦିକ ମାନଙ୍କୁ ମଧ୍ୟ କୋରୋନା ଯୋଦ୍ଧାଭାବେ ଘୋଷଣା କରି ସେମାନଙ୍କ ମୃତ୍ୟୁ ପାଇଁ 15 ଲକ୍ଷ ଟଙ୍କା ଘୋଷଣା କରାଯାଇଥିଲା । ସେହି ଅନୁସାରେ ଆଜି 2ଜଣ ସାମ୍ବାଦିକଙ୍କୁ ଏହି ଅନୁକମ୍ପା ମୂଳକ ରାଶି ପ୍ରଦାନ କରାଯିବା ନେଇ ସରକାର ଘୋଷଣା କରିଛନ୍ତି ।
ପାରଳାଖେମୁଣ୍ଡିର ଜଣେ ବରିଷ୍ଠ ସାମ୍ବାଦିକ(ଇନାଡୁ) କେ.ଚିନ୍ନା ରତ୍ନମଙ୍କ ନାମ ଏଥିରେ ରହିଥିବାରୁ ବିଭିନ୍ନ ମହଲରୁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି । ତାଙ୍କ ପରିବାର ଲୋକେ ମଧ୍ୟ ରାଜ୍ୟ ସରକାର ଏବଂ ମୁଖ୍ୟମନ୍ତ୍ରୀଙ୍କୁ ସାଧୁବାଦ ଜଣାଇଛନ୍ତି । କୋରୋନା ଭଳି ମହାମାରୀ ସମୟରେ ସମସ୍ତେ ଘରେ ରହୁଥିବା ବେଳେ ସାମ୍ବାଦିକ ମାନେ ବାହାରେ ବୁଲି ଖବର ସଂଗ୍ରହ କରୁଛନ୍ତି ।
ଠିକ ସେହିଭଳି କାମ କରିବା ସମୟରେ ରତ୍ନମ ମଧ୍ୟ କୋରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିବା ବେଳେ ଆଖି ବୁଜିଥିଲେ । ତାଙ୍କୁ ହରାଇବା ପରେ ପରିବାର ଲୋକେ ସେମାନଙ୍କ ଭବିଷ୍ୟତକୁ ନେଇ ଚିନ୍ତାରେ ପଡିଥିବା ବେଳେ ରାଜ୍ୟ ସରକାରଙ୍କ ଏହି ସହାୟତା ସେମାନଙ୍କୁ ଚିନ୍ତା ମୁକ୍ତ କରିଛି ବୋଲି ତାଙ୍କ ପରିବାର ଲୋକେ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
