ଗଜପତି: ସାନ ଭାଇର ଟାଙ୍ଗିଆ ଚୋଟରେ ବଡ ଭାଇର ମୃତ୍ୟୁ ଘଟଣାରେ ଆସିଛି ନୂଆ ମୋଡ । ବଡ ପୁଅ ଓ ତାଙ୍କ ସ୍ତ୍ରୀକୁ ହତ୍ୟା କରିବା ପାଇଁ ମାଆ ସୁଶିଳା ହିଁ କହିଥିବା ପୋଲିସ ଆଜି ସୂଚନା ଦେବା ସହ ଏହା ପଛରେ 20 ହଜାର ଟଙ୍କା କାରଣ ବୋଲି କହିଛି ।
ପାରଳାଖେମୁଣ୍ଡି ଏସଡିପିଓ ଠାକୁର ପ୍ରସାଦ ପାତ୍ରଙ୍କ ସୂଚନା ଅନୂସାରେ ଚିନ୍ତାପଲ୍ଲୀ ଗାଁର ରାମଚନ୍ଦ୍ର ବେହେରାଙ୍କ 2ଟି ପୁଅ ଓ ଗୋଟିଏ ଝିଅ । ଝିଅ ବାହାଘର ପାଇଁ ବଡ ପୁଅ ସୁନ୍ଦରଙ୍କ ଠାରୁ 20 ହଜାର ଟଙ୍କା ଋଣ ଆକାରେ ନେଇଥିଲେ । ଏହାକୁ ନେଇ ସୁନ୍ଦର ଓ ତାଙ୍କ ମାଆ ସୁଶିଳାଙ୍କ ମଧ୍ୟରେ ବିଭିନ୍ନ ସମୟରେ କଳହ ଲାଗି ରହୁଥିଲା । ତେବେ ଗତକାଲି ମଧ୍ୟାହ୍ନରେ ପୁଣିଥରେ କଳହ ହୋଇଥିବା ବେଳେ ମାଆ ସାନ ପୁଅକୁ ବଡ ଭାଇକୁ ହତ୍ୟା କରିବା ପାଇଁ କହିବା ପରେ ସାନ ପୁଅ ତାରକେଶ୍ବର ଏକ ଟାଙ୍ଗିଆରେ ଉଭୟ ସୁନ୍ଦର ଓ ତାଙ୍କ ସ୍ତ୍ରୀକୁ ଆକ୍ରମଣ କରିଥିଲା ।
ତେବେ ଘଟଣାସ୍ଥଳରେ ସୁନ୍ଦରଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ସ୍ତ୍ରୀ ମୋହିନୀ ଗୁରୁତର ଭାବେ ଆହତ ହୋଇ ଚିକିତ୍ସାଧୀନ ଅଛନ୍ତି । ଏହି ଘଟଣାରେ ପୋଲିସ ଉଭୟ ମାଆ ଓ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଥିବା ଏସଡିପିଓ ସୂଚନା ଦେଇଛନ୍ତି।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
