ଗଜପତି: ପାରଳାଖେମୁଣ୍ଡିରେ ମା କଦମଖଣ୍ଡିଙ୍କ ଗଜମୁଆଁ ଯାତ୍ରା ମହାସମାରୋହରେ ପାଳିତ ହୋଇଛି । ମାଙ୍କ ଗଜାମୁଆଁକୁ ଆକର୍ଷଣୀୟ ସାଜସଜା କରି ମୁଣ୍ଡରେ ଧରି ଲୋକେ ପ୍ରତ୍ୟେକ ସାହି ଭ୍ରମଣ କରିଛନ୍ତି । ରାତି ସାରା ଏହି ଉତ୍ସବକୁ ସହରବାସୀ ଭରପୁର ଉପଭୋଗ କରିଛନ୍ତି ।
ସହରରେ ଆଧୁନିକତା ଛାପ ପଡିଥିଲେ ମଧ୍ୟ ରୋଗ ମୁକ୍ତ ରହିବା ପାଇଁ ପୁରାତନ କାଳରୁ ପାରଳାଖେମୁଣ୍ଡି ବାସୀ ମା କଦମଖଣ୍ଡିଙ୍କ ଗଜାମୁଆଁ ଯାତ୍ରା ପାଳନ କରିଆସୁଛନ୍ତି । ଚୈତ୍ର ମାସର ପ୍ରତ୍ୟେକ ମଙ୍ଗଳବାରରେ ଏହି ଯାତ୍ରା ବାହାରିଥାଏ । ମୁଖ୍ୟତଃ ଶେଷ ମଙ୍ଗଳବାରରେ ଏହି ଯାତ୍ରା ସାରା ରାତି ସହରର ପ୍ରତି ଗଳିକନ୍ଦିରେ ବୁଲିଥାଏ । ଶ୍ରଦ୍ଧାଳୁ ମାନେ ଗଜାମୁଆଁ ଧରି ସହର ପରିକ୍ରମା କରିଥାନ୍ତି । ଯାହାକି ଅନ୍ୟ କେଉଁଠାରେ ଦେଖିବାକୁ ମିଳେ ନାହିଁ ।
ବହୁ ବର୍ଷ ପୂର୍ବେ ପାରଳାଖେମୁଣ୍ଡି ସହରରେ ହଇଜା, ହାଡଫୁଟି ଭଳି ରୋଗରେ ଆକ୍ରାନ୍ତ ହୋଇ ବହୁ ସଂଖ୍ୟାରେ ଲୋକେ ପ୍ରାଣ ତ୍ୟାଗ କରିଥିଲେ । ସେହି ସମୟରେ ପାରଳାବାସୀଙ୍କ ପୂଜକ ମାନେ ମା କଦମଖଣ୍ଡିଙ୍କୁ ଗୁହାରୀ କରି ଗଜାମୁଆଁ ଭୋଗ ଅର୍ପଣ କରିଥିଲେ । ତା ପରଠାରୁ ସହରରେ କୌଣସି ଲୋକ ରୋଗକ୍ରାନ୍ତ ହୋଇନଥିଲେ । ଏହି ବିଶ୍ବାସ ନେଇ ସେହିଦିନ ଠାରୁ ଏହି ପର୍ବକୁ ପାରମ୍ପରିକ ଭାବେ ଲୋକେ କରିଆସିଛନ୍ତି । ପ୍ରଥମେ ଏହି ପର୍ବ ପାରଳାଖେମୁଣ୍ଡିର କବିଚନ୍ଦ୍ର ସାହିରୁ ଆରମ୍ଭ ହୋଇଥିଲା । କାଳକ୍ରମେ ପ୍ରତ୍ୟେକ ସାହି ଏହି ଉତ୍ସବକୁ ପାଳନ କରିଆସୁଛନ୍ତି । ଚଳିତ ବର୍ଷ ମଧ୍ୟ ଏହି ଉତ୍ସବ ଲୋକେ ବହୁ ଆଡମ୍ବର ସହ ପାଳନ କରିଛନ୍ତି ।
ମାନସିକ କରିଥିବା ଲୋକେ ମାଙ୍କ ଏହି ଗଜା ମୁଆଁକୁ ମୁଣ୍ଡରେ ଧରି ଅତି ଆନନ୍ଦରେ ନାଚନ୍ତି। ଶ୍ରଦ୍ଧାଳୁ ମାନେ ଏହାକୁ ଭକ୍ତିର ସହକାରେ ଉପଭୋଗ କରନ୍ତି। ନିଜ ପରିବାରକୁ ରୋଗମୁକ୍ତ ଓ ପରିବାରର ସୁରକ୍ଷା କାମନା କରି ଏହି ପର୍ବରେ ବହୁ ଦୂରଦୁରାନ୍ତରେ ରହୁଥିବା ପାରଳାଖେମୁଣ୍ଡିବାସୀ ଆସି ପହଞ୍ଚିଥାନ୍ତି ।
ସାରା ରାତି ଏହି ଉତ୍ସବକୁ ସହରବାସୀ ଉପଭୋଗ କରୁଥିବାବେଳେ ଜାତି ଧର୍ମ ନିର୍ବିଶେଷରେ ସମସ୍ତ ଏକାଠି ହୋଇ ଯାତ୍ରାକୁ ପାଳନ କରିଥାନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
