ଗଜପତି: ଶହ ଶହ ବର୍ଷର ପୁରୁଣା ପାରଳାଖେମୁଣ୍ଡି ସହରର ରାସ୍ତା ପ୍ରଶସ୍ତିକରଣ ପାଇଁ ପ୍ରଶାସନ ପକ୍ଷରୁ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି । ଦୀର୍ଘ ଦିନ ହେଲା ଏଥିପାଇଁ ଅର୍ଥ ମଞ୍ଜୁର ହୋଇଥିଲା । ସହରର ପ୍ରବେଶ ପଥ କାମ ଜାରି ରହିଥିବାବେଳେ ବର୍ତ୍ତମାନ ସହର ମଧ୍ୟରେ ରାସ୍ତା ପ୍ରଶସ୍ତିକରଣ କାମ ଆରମ୍ଭ କରିବାକୁ ଅଣ୍ଟା ଭିଡିଛି ପ୍ରଶାସନ । ସହର ମଧ୍ୟରେ ଥିବା ରାସ୍ତା ବର୍ତ୍ତମାନ ୨୬ଫୁଟ ରହିଥିବା ବେଳେ ଏହାକୁ ୪୦ ଫୁଟ ପର୍ଯ୍ୟନ୍ତ ପ୍ରଶସ୍ତ କରିବା ପାଇଁ ପ୍ରକ୍ରିୟା ଆରମ୍ଭ ହୋଇଛି ।
ଏଥିପାଇଁ ରାସ୍ତା କଡରେ ଥିବା ଘର ମାଲିକଙ୍କୁ ସରକାରଙ୍କ ପକ୍ଷରୁ କ୍ଷତିପୂରଣ ପ୍ରଦାନ କରାଯାଇଥିଲା । ତେବେ ଘର ମାଲିକମାନେ ନିଜେ ଏହାକୁ ଆଜି ଯାଏଁ ଭାଙ୍ଗିନଥିବାରୁ ବର୍ତ୍ତମାନ ପ୍ରଶାସନ ଭାଙ୍ଗୁଥିବା ପାରଳାଖେମୁଣ୍ଡି ତହସିଲଦାର ଅଚ୍ୟୁତାନନ୍ଦ ଜାନି ପ୍ରକାଶ କରିଛନ୍ତି । ଥାନା ଛକ ଠାରୁ କୋର୍ଟ ଛକ ଯାଏଁ ଏହି ରାସ୍ତା ପ୍ରଶସ୍ତିକରଣ କରିବା ପାଇଁ ଯୋଜନା ରହିଥିବାରୁ ଏହି ସମସ୍ତ ଅଞ୍ଚଳରେ ଆବଶ୍ୟକୀୟ ଉଚ୍ଛେଦ କରାଯିବ ବୋଲି ସେ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
