ଗଜପତି: ଅଧା ରହିଗଲା ଗଞ୍ଜେଇ ଚାଲଣ । ପୋଲିସ କବଳରେ ଚାଲାଣକାରୀ । ଗଜପତି ଜିଲ୍ଲା ମୋହନ ଥାନା ପୋଲିସ ଶୁକ୍ରବାର ତରାମାଳ ନିକଟରୁ ଏକ ଟ୍ରକରୁ 21 ବସ୍ତା ଗଞ୍ଜେଇ ଜବତ କରିଛି । ଯାହାର ଆନୁମାନିକ ମୂଲ୍ୟ ପାଖାପାଖି 40 ଲକ୍ଷ ଟଙ୍କା ହେବ ବୋଲି ପୋଲିସ ସୂଚନା ଦେଇଛି । ଘଟଣାରେ ସଂପୃକ୍ତ 6 ଜଣଙ୍କୁ ପୋଲିସ ଗିରଫ କରିବା ସହ ସେମାନଙ୍କ ନିକଟରୁ ଏକ ବାଇକ ଜବତ କରିଛି । ଅଭିଯୁକ୍ତମାନେ ହେଲେ ହରିୟାଣାର ବିନୋଦ କୁମାର ଶର୍ମା, ଜୟପାଲ ସିଂହ, ସୁରେଶ କଶ୍ୟପ, ବାଳକ ରାମ ଓ ଚନ୍ଦ୍ରଗିରି ଅଞ୍ଚଳର ମନୋଜ ବିର ଓ ସୁକାନ୍ତ ମାଝୀ ।
ସୂଚନା ଅନୁଯାୟୀ, ଅଭିଯୁକ୍ତମାନେ ଶିକୁଳିପଦ ଅଞ୍ଚଳରୁ ଏକ ଟ୍ରକରେ ଗଞ୍ଜେଇ ନେଇ ହରିୟାଣା ଅଭିମୁଖେ ଯାଉଥିଲେ । ମୋହନ ଥାନା ପୋଲିସ ତରାମାଳ ନିକଟରେ ଯାଞ୍ଚ କଲାବେଳେ ଉକ୍ତ ଟ୍ରକର ଗୁପ୍ତ କୋଠରୀରୁ 610 କେଜି ଗଞ୍ଜେଇ ଜବତ କରିଛି । ଯାହାର ଆନୁମାନିକ ମୂଲ୍ୟ 40 ଲକ୍ଷ ଟଙ୍କା ହେବ । ଘଟଣାରେ ସଂପୃକ୍ତ 6 ଅଭିଯୁକ୍ତଙ୍କୁ ପୋଲିସ ଗିରଫ କରିବା ସହ ଏ ସମ୍ପର୍କରେ ଅଧିକ ଛାନଭିନ୍ କରୁଛି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
