ଢେଙ୍କାନାଳ: ମୃତ୍ୟୁ କିପରି ଆସେ ? କେମିତି ହୁଏ ? ତାହା କେହି କେବେ ଦେଖିନଥିବା ବେଳେ ଏବେ ମୃତ୍ୟୁର ଏକ ଲାଇଭ ଭିଡିଓ ସାମ୍ନାକୁ ଆସିଛି । ଯାହା ଦେଖିଲେ ଆପଣଙ୍କ ଛାତି ଥରି ଉଠିବ । ଜଣେ ଯୁବକ କିପରି ବେକରେ ରସି ଲଗାଇ ଆତ୍ମହତ୍ୟା କରୁଛନ୍ତି ତାହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭିଡିଓରେ ଦେଖିବାକୁ ମିଳିଛି ଯେ ଯୁବକ ଜଣଙ୍କ ପାଦ ତଳେ କିଛି ଇଟା ରଖି ତା ଉପରେ ଠିଆ ହୋଇଛନ୍ତି ଏବଂ ବେକରେ ଏକ ରଶି ଲଗାଉଛନ୍ତି । ଏହା ପରେ କିଛି ସମୟ ପରେ ରଶିରେ ଝୁଲି ପଡୁଛନ୍ତି । ଶେଷରେ କିଛି ସେକେଣ୍ଡ ଛଟପଟ ହେବା ପରେ ତାଙ୍କର ମୃତ୍ୟୁ ହେଉଛି । ମୃତ୍ୟୁର ଏହି ଭିଡିଓଟି ଯୁବ କ ନିଜେ ରେକଡିଂ କରିଥିବା ଜଣାପଡିଛି । ଯାହା ଏବେ ଫୋନରୁ ଫୋନ ଭାଇରାଲ ହେଉଛି ।
ଏ ଭିଡିଓ ହେଉଛି ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ସୋଲଗାଁର । ଗତ ରବିବାର ଗ୍ରାମର ପ୍ରଦୀପ ବେହେରା ଭିଡିଓ ରେକର୍ଡ କରି ଆତ୍ମହତ୍ୟା କରିଥିବା ଜଣାପଡିଛି । ଯୁବକଙ୍କୁ ଝୁଲନ୍ତା ଅବସ୍ଥାରେ ପରିବାର ଲୋକେ ଦେଖି ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଛେଦ ପାଇଁ ପାଠାଇ ଏକ ଅପମୃତ୍ୟୁ ମାମଲା ରୁଜୁ କରିଥିଲା।
ତେବେ ପ୍ରଦୀପ ନିଜେ ମୃତ୍ୟୁ ପୂର୍ବରୁ ଏହି ଲାଇଭ ଭିଡିଓ କରିଥିବା ବେଳେ ପରିବାର ଲୋକେ ଏହା ଦେଖିବା ପରେ ଆତ୍ମହତ୍ୟାର ମୁଖ୍ୟ କାରଣ ତାଙ୍କ ସ୍ତ୍ରୀ ବୋଲି ଚର୍ଚ୍ଚା ହେଉଛି । ପ୍ରଦୀପଙ୍କ ସ୍ତ୍ରୀଙ୍କ ଗ୍ରାମର ଅନ୍ୟ ଏକ ଯୁବକଙ୍କ ସହିତ ଆପତ୍ତିଜନକ ଫଟୋ ଦେଖିବାପରେ ଉଭୟ ସ୍ବାମୀ ସ୍ତ୍ରୀଙ୍କ ମଧ୍ୟରେ ବଚସା ହେବା ସହ ପାରିବାରିକ ଅଶାନ୍ତି ଲାଗି ରହୁଥିଲା। ଫଳରେ ମାନସିକ ଯନ୍ତ୍ରଣାରେ ଛଟପଟ ହୋଇ ଯୁବକ ଜଣଙ୍କ ଆତ୍ମହତ୍ୟା କରିଥିବା କହିଛନ୍ତି ପରିବାର ଲୋକେ। ଏ ନେଇ ପରିବାର ତରଫରୁ ଥାନାରେ କୌଣସି ଅଭିଯୋଗ ହୋଇନାହିଁ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
