ଢେଙ୍କାନାଳ: ଢେଙ୍କାନାଳର ମୋଟଙ୍ଗା ଥାନା ଅନ୍ତର୍ଗତ ଇଟାପ ଛକରେ ମର୍ମନ୍ତୁଦ ସଡକ ଦୁର୍ଘଟଣା । ପତି ପତ୍ନୀ ନିଜର ୨ବର୍ଷର ଶିଶୁ ପୁଅକୁ ନେଇ ବାଇକ ଯୋଗେଁ ଯାଉଥିବାବେଳେ ପଛପଟୁ ଏକ ଟ୍ରକ ଚଢି ଯାଇଥିଲା । ଘଟଣାସ୍ଥଳରେ ଟ୍ରକ ଚକ ତଳେ ଚାପି ହୋଇ ସ୍ତ୍ରୀଙ୍କର ମୃତ୍ୟୁ ଘଟିଛି । ଅନ୍ୟପଟେ ସ୍ୱାମୀ ଗୁରୁତର ହୋଇଥିବା ବେଳେ ବାଇକରୁ ଛିଟିକି ପଡିଥିଲା । ସୌଭାଗ୍ୟବଶତଃ ୨ବର୍ଷର ପୁଅ କିନ୍ତୁ ସୁରକ୍ଷିତ ଥିବା ଜଣାପଡିଛି ।
ତେବେ ମୃତାହତ ଦମ୍ପତି ଢେଙ୍କାନାଳ ଜିଲ୍ଲା ଗଁନ୍ଦିଆ ଥାନା ଅନ୍ତର୍ଗତ ବନବାସୀପୁର ଗ୍ରାମର ସୁବାଷ ଚନ୍ଦ୍ର ମିଶ୍ର ଓ ତାଙ୍କ ପତ୍ନୀ ମନୋରମା ମିଶ୍ର ବୋଲି ଜଣାପଡିଛି । ଗୁରୁତର ସୁଭାଷ ସ୍ଥାନୀୟ ଟାଟା ଷ୍ଟିଲର କର୍ମଚାରୀ ବୋଲି ସୂଚନା ମିଳିଛି । ସୂଚନା ଅନୁଯାୟୀ, ସୁବାଷ ତାଙ୍କ ପରିବାର ସହ ବନରପାଳରେ ଭଡା ଘରେ ରହୁଥିଲେ । ତାଙ୍କ ପତ୍ନୀ ଓ ପୁଅକୁ ନେଇ ବାଇକ ଯୋଗେଁ ଶ୍ବଶୁର ଘର ଧଳପୁରକୁ ଯାଉଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇଥିବା ଜଣାପଡିଛି ।
ଏହା ମଧ୍ୟ ପଢନ୍ତୁ-ଦମ୍ପତିଙ୍କ ଉପରେ ମାଡ଼ିଗଲା ଟ୍ରକ, ସ୍ବାମୀ ମୃତ
୫୫ ଜାତୀୟ ରାଜପଥର ଢେଙ୍କାନାଲ ଜିଲ୍ଲା ମୋଟଙ୍ଗା ଥାନା ଅନ୍ତର୍ଗତ ଇଟାପ ଛକରେ ବାଇକ ଉପରେ ପଛପଟୁ ଏକ ଟ୍ରକ ଚଢି ଯାଇଥିଲା । ଘଟଣାସ୍ଥଳରେ ଟ୍ରକ ଚକ ତଳେ ଚାପି ହୋଇ ସ୍ତ୍ରୀର ମୃତ୍ୟୁ ଘଟିଛି । ତେବେ ଘଟଣାସ୍ଥଳରେ ଉତ୍ୟକ୍ତ ଲୋକେ ଏଚ-୫୫କୁ ଅବରୋଧ କରିବା ଯୋଗୁଁ ସାଧାରଣ ଯାତାୟାତ ବାଧାପ୍ରାପ୍ତ ହୋଇଥିଲା । ଯାହାକୁ ନେଇ ଘଟଣାସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଥିଲା । ଖବର ପାଇ ମୋଟଙ୍ଗା ପୁଲିସ ପହଞ୍ଚି ଦୁର୍ଘଟଣା ଘଟାଇଥିବା ଟ୍ରକକୁ ଜବତ କରିଥିବାବେଳେ ଟ୍ରକ ଡ୍ରାଇଭର ଫେରାର ହୋଇଯାଇଥିବା ନେଇ ଜଣାପଡିଛି । ତେବେ ଉତ୍ୟକ୍ତ ଲୋକଙ୍କୁ ପୁଲିସ ବୁଝାସୁଝା କରିବା ପରେ ଜାତୀୟ ରାଜପଥରେ ଯାତାୟାତ ସ୍ବଭାବିକ ହୋଇଥିଲା ।
ସୂଚନା ଥାଉକି, ସେହି ପରି କିଛିଦିନ ପୂର୍ବେ ଢେଙ୍କାନାଳରେ ଶଙ୍କରପୁର ମୁଖ୍ୟ ରାସ୍ତାରେ ବାଇକ ଯୋଗେ ଦମ୍ପତି ଘରକୁ ଫେରୁଥିବାବେଳେ ପଛପଟୁ ଆସୁଥବା ଏକ ଟ୍ରକ ଧକ୍କା ଦେଇଥିଲା। । ଘଟଣା ସ୍ଥଳରେ ଦମ୍ପତ୍ତିଙ୍କ ମଧ୍ୟରୁ ସ୍ବାମୀଙ୍କ ମୃତ୍ୟୁ ହୋଇଥିଲା ଓ ପତ୍ନୀ ଗୁରୁତର ଆହତ ହୋଇଥିଲେ । ପତ୍ନୀଙ୍କୁ ଗୁରୁତର ଅବସ୍ଥାରେ କଟକ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା ।
ଇଟିଭି ଭାରତ, ଢେଙ୍କାନାଳ
