ଢେଙ୍କାନାଳ: ପୁଣି ଦନ୍ତା ନେଲା ଜୀବନ । ଢେଙ୍କାନାଳ ହିନ୍ଦୋଳ ବନାଞ୍ଚଳରେ ଜଣେ ଶ୍ରମିକଙ୍କୁ ଶୁଣ୍ଢରେ କଚାଡି ମାରିଛି ଦନ୍ତା । ମୃତକ ଜଣଙ୍କ ରାସୋଳ ଥାନା ଅନ୍ତର୍ଗତ ବମ୍ପା ଗ୍ରାମର ଭାସ୍କର ବେହେରା ବୋଲି ଜଣାପଡିଛି ।
ଦନ୍ତା ନେଲା ଜୀବନ, ଶ୍ରମିକକୁ ଶୁଣ୍ଢରେ କଚାଡି ମାରିଲା ହାତୀ
ଭାସ୍କରଙ୍କ ମୃତଦେହ ହିନ୍ଦୋଳ ବନାଞ୍ଚଳର ବମ୍ପା ନିକଟସ୍ଥ କାଜୁ ଜଙ୍ଗଲରୁ ଠାବ କରାଯାଇଛି। ଗୁରୁବାର ଠାରୁ ଭାସ୍କର ବାବନ୍ଧ ସ୍ଥିତ ବ୍ୟାଙ୍କକୁ ଯାଇ ଘରକୁ ଫେରି ନଥିଲେ । ଫଳରେ ତାଙ୍କ ପରିବାର ପକ୍ଷରୁ ତାଙ୍କୁ ଖୋଜ ଖୋଜି କରି ପାଇନଥିଲେ । ତେବେ ଶୁକ୍ରବର ବାବନ୍ଧ ବମ୍ପା ରାସ୍ତାର କାଜୁ ଜଙ୍ଗଲ ରେ ତାଙ୍କ ମୃତ ଦେହକୁ ଗ୍ରାମବାସୀ ଠାବ କରିଛନ୍ତି।
ଏହି ଅଞ୍ଚଳରେ ବୁଲୁଥିବା ଏକ ଦନ୍ତା ହାତୀ ତାଙ୍କୁ ଶୁଣ୍ଢରେ କଚାଡି ମାରି ଦେଇଥିବା ଜଣାପଡିଛି । ଖବର ପାଇ ଘଟଣାସ୍ଥଳକୁ ବନ କର୍ମଚାରୀ ମାନେ ପହଞ୍ଚିଛନ୍ତି । ମୃତଦେହ ଉଦ୍ଧାର କରିବା ସହ ବ୍ୟବଚ୍ଛେଦ ପାଇଁ ପଠାଇ ତଦନ୍ତ କରୁଛି ବନ ବିଭାଗ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
