ଢେଙ୍କାନାଳ: ପାଖଉଛି ପଞ୍ଚାୟତ ନିର୍ବାଚନ । ଏନେଇ ବଢୁଛି ରାଜନୈତିକ ତାତି । ଢେଙ୍କାନାଳ ଜିଲ୍ଲା ବଦାଳୁ ସରପଞ୍ଚ ପ୍ରାର୍ଥୀ ନୃସିଂହ ବାରିକଙ୍କ ଉପରକୁ କିଛି ଦୁର୍ବୃତ୍ତ ଆକ୍ରମଣ କରିଛନ୍ତି । ତାଙ୍କୁ ଗୁରୁତର ଅବସ୍ଥାରେ ଢେଙ୍କାନାଳ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ତାଙ୍କ ମୁଣ୍ଡରେ ଆଘାତ ଲାଗିଥିବା ଜଣାପଡିଛି ।
ଆହତ ନୃସିଂହ ବାରିକ ଓଡାପଡା ବ୍ଲକ ଅନ୍ତର୍ଗତ ବଦାଳୁ ଗ୍ରାମ ପଞ୍ଚାୟତର ସରପଞ୍ଚ ପ୍ରାର୍ଥୀ । ସେ ସ୍କୁଟି ଯୋଗେ ଘରୁ ବାହାରି ତାଙ୍କ କ୍ରସରକୁ ଯାଉଥିବା ବେଳେ ବଦାଳୁ ଘୋଡାଡିଆଁ ଛକରେ ତାଙ୍କୁ ଆକ୍ରମଣ ହୋଇଥିବା ସେ ଅଭିଯୋଗ କରିଛନ୍ତି । ଏକ ବାଇକରେ ଆସି କିଛି ଦୁର୍ବୃତ୍ତ ତାଙ୍କ ମୁଣ୍ଡକୁ ପିଟିବା ସହ ତାଙ୍କୁ ନିସ୍ତୁକ ମାଡ ମାରିଥିଲେ । ସେମାନେ ମାସ୍କ ପିନ୍ଧିଥିବାରୁ ତାଙ୍କୁ ଚିହ୍ନି ନଥିବା ପ୍ରକାଶ କରିଛନ୍ତି ନୃସିଂହ ।
ସୂଚନା ଥାଉ କି ବଦାଳୁ ପଞ୍ଚାୟତରେ ନୃସିଂହଙ୍କୁ ମିଶାଇ ମୋଟ ୩ଜଣ ସରପଞ୍ଚ ପ୍ରାର୍ଥୀ ନିର୍ବାଚନ ଲଢ଼ୁଥିବା ଜଣାପଡିଛି । ଆକ୍ରମଣର ସଠିକ କାରଣ ଜଣାପଡିନଥିଲେ ମଧ୍ୟ ନିର୍ବାଚନ ଯୋଗୁଁ ଅପରଗୋଷ୍ଠୀ ତାଙ୍କୁ ଆକ୍ରମଣ କରିଥାଇ ପାରନ୍ତି ବୋଲି କହିଛନ୍ତି ଆହତ ନୃସିଂହ । ମୋଟଙ୍ଗା ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ଢେଙ୍କାନାଳରୁ ଉର୍ମିଳା ପାତ୍ର,ଇଟିଭି ଭାରତ
