ଢେଙ୍କାନାଳ: ୩୦ହଜାର ଟଙ୍କା ଲାଞ୍ଚ ନେଇ ଭିଜିଲାନ୍ସରେ ଗିରଫ ଢେଙ୍କାନାଳର ସଦର ଥାନା ଅଧିକାରୀ ଦାୟିତ୍ୱରେ ଥିବା ଡିଏସପି ଅଭିନବ ଡାଲୁଆଙ୍କ ଦୁଇ ଦିନିଆ ରିମାଣ୍ଡ ସରିବା ପରେ ଶନିବାର ଭିଜିଲାନ୍ସ ପକ୍ଷରୁ ପୁଣି ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯାଇଛି । ରିମାଣ୍ଡ ସମୟରେ ଭିଜିଲାନ୍ସ ହାତରେ ଲାଗିଛି ଡିଏସପିଙ୍କ କଳା ସମ୍ପତ୍ତିର ଲମ୍ବା ତାଲିକା ।
୩୦ହଜାର ଟଙ୍କା ଲାଞ୍ଚ ନେଇ ଭିଜିଲାନ୍ସରେ ଗିରଫ ଢେଙ୍କାନାଳର ସଦର ଥାନା ଅଧିକାରୀ ଦାୟିତ୍ୱରେ ଥିବା ଡିଏସପି ଅଭିନବ ଡାଲୁଆଙ୍କ ଦୁଇ ଦିନିଆ ରିମାଣ୍ଡ ସରିବା ପରେ ଶନିବାର ଭିଜିଲାନ୍ସ ପକ୍ଷରୁ ପୁଣି ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯାଇଥିଲା । ତାଙ୍କୁ ପୁଣି ବିଚାର ବିଭଗୀୟ ହାଜତକୁ ପଠାଇ ଦିଆଯାଇଛି । ସେପଟେ ତାଙ୍କର ଗତ ୯ ତାରିଖରେ ଥିବା ଜାମିନ ଶୁଣାଣି ପୁଣି ୧୪ତାରିଖକୁ ଘୁଞ୍ଚାଇ ଦିଆଯାଇଥିବା ଭିଜିଲାନ୍ସ କୋର୍ଟ ପକ୍ଷରୁ ଜଣାପଡିଛି । ତେବେ ଭିଜିଲାନ୍ସ ତାଙ୍କୁ ଗତ ୮ତାରିଖରୁ ରିମାଣ୍ଡରେ ନେଇ ତାଙ୍କର ସ୍ୱର ବା ଭଏସ ସାମ୍ପଲ ନେଇ ଯାଞ୍ଚ ପାଇଁ ଫରେନ୍ସିକ ଲାବ୍ରୋଟେରୀକୁ ପଠାହୋଇଛି । ଅପରପକ୍ଷରେ ଏହି ଲାଞ୍ଚୁଆ ଡିଏସପି ବେଆଇନ ଭାବେ ଠୁଳ କରିଥିବା ବିଭିନ୍ନ ସ୍ଥାବର ଓ ଅସ୍ଥାବର ସମ୍ପତ୍ତିର ସମ୍ପର୍କରେ ଭିଜିଲାନ୍ସ ପକ୍ଷରୁ ବାଲେଶ୍ୱର, କେନ୍ଦୁଝର, ଯାଜପୁର, ଖୋର୍ଦ୍ଧା, ଜଟଣୀ ଓ ଢେଙ୍କାନାଳର ବିଭିନ୍ନ ଜାଗାରେ ଚଢ଼ାଉ କରି ଛାନଭିନ କରିବାରେ ଏକ ଲମ୍ବା ତାଲିକା ଭିଜିଲାନ୍ସ ହାତରେ ଲାଗିଛି ।
ତେବେ ଏହି ଲାଞ୍ଚୁଆ ଡ଼ିଏସପି ଅଭିନବ ଡାଲୁଆ ତାଙ୍କ ପତ୍ନୀ, ଶାଶୁ ଓ ଶଳା ନାମରେ ଜଟଣୀ, ଖୋର୍ଦ୍ଧା, ଯାଜପୁର, କେନ୍ଦୁଝର ଓ ଢେଙ୍କାନାଳରେ ଥିବା ୧୪ଟି ପ୍ଲଟ ଠାବ ହୋଇଛି । ଯାହାର ମୂଲ୍ୟ ୨କୋଟି ଟଙ୍କାରୁ ଅଧିକ ହେବ ବୋଲି ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି । ଅପରପକ୍ଷରେ ତାଙ୍କର ବିଭିନ୍ନ ଜାଗାରେ ବଡ ବଡ ଆପାର୍ଟମେଣ୍ଟ, ବ୍ୟାପକ ବ୍ୟାଙ୍କ ବାଲାନ୍ସ, ବିଭିନ୍ନ ବୀମା, ଏବଂ ଗାଡି ଆଦିର ଏକ ଲମ୍ବା ତାଲିକା ଭିଜିଲାନ୍ସ ହାତରେ ଲାଗିଥିବା ବିଶେଷ ସୂତ୍ରରୁ ଜଣାପଡିଛି ।
ସୂଚନା ଥାଉକି, ଅଭିନବ ଡାଲୁଆ ଢେଙ୍କାନାଳ ରହିବା ପରଠାରୁ ଚୋରା ବ୍ରାଉନ ସୁଗାର, କୋଇଲା, ଗୋରୁ ଚାଲାଣ, ବାଲି ଓ ପଥର ଖଣି ମାଫିଆଙ୍କ ସହ ଜଡିତ ହୋଇ କୋଟି କୋଟି ଟଙ୍କା ବେଆଇନ ସମ୍ପତ୍ତି ଠୁଳ କରୁଥିବା ଅନେକ ଅଭିଯୋଗ ହୋଇଥିଲା । ଫଳରେ ଭିଜିଲାନ୍ସର ଟ୍ରାପ ପରେ ଲାଞ୍ଚୁଆ ଡ଼ିଏସପି ଅଭିନବ ଡାଲୁଆଙ୍କ କଳା ସାମ୍ରାଜ୍ୟ ବାବଦରେ ଖୋଳତାଡ ଜାରି ରଖିଛି ।
ଇଟିଭି ଭାରତ, ଢେଙ୍କାନାଳ
