ଢେଙ୍କାନାଳ: ଜିଲ୍ଲାର ଦୈନିକ କୋଭିଡ ସଂକ୍ରମଣ ହାର ୫ ପ୍ରତିଶତ ତଳେ ରହିଛି । ଏହାକୁ ନେଇ ରାଜ୍ୟରେ ଢେଙ୍କାନାଳ ଜିଲ୍ଲାକୁ କଟାଗୋରୀ-Aରେ ସାମିଲ କରି ୧ତାରିଖ ଠାରୁ କଟକଣା କୋହଳ କରାଯାଇଛି । ସରକାରଙ୍କ ଗାଇଡ ଲାଇନ ଅନୁସାରେ ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ୧୨ଘଣ୍ଟିଆ ସମସ୍ତ ଦୋକାନ ବଜାର ଖୋଲି ଥିବା ଦେଖିବାକୁ ମିଳିଛି ।
ଦୋକାନ ବଜାର ଖୋଲିବା ପରେ ଦୋକାନୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ଲକଡାଉନରେ ଆର୍ଥିକ ମେରୁଦଣ୍ଡ ଭାଙ୍ଗି ପଡିଥିବା ଦୋକାନୀ ମାନଙ୍କ ମହଲରେ ଏକ ପ୍ରକାର ନୂତନ ଆଶା ସଞ୍ଚାର କରିଛି । ତେବେ ଦୈନିକ ସଂକ୍ରମଣ କମିଥିବାରୁ ସରକାର କଟକଣା କୋହଳ କରିଛନ୍ତି । ହେଲେ କୋଭିଡ ମୃତ୍ୟୁ ସଂଖ୍ୟା ଜିଲ୍ଲାରେ ଅହେତୁକ ବୃଦ୍ଧି ପାଉଛି ।
ଗତ ବର୍ଷ ପ୍ରଥମ ଲହରରେ ଢେଙ୍କାନାଳ ଜିଲ୍ଲାର ମୋଟ କୋଭିଡ ଜନିତ ମୃତ୍ୟୁ ସଂଖ୍ୟା ୨୯ ରହିଥିଲା । ଚଳିତ ବର୍ଷ ଏହି ଦ୍ବିତୀୟ ଲହରରେ ମାତ୍ର ତିନି ମାସରେ ମୃତ୍ୟୁ ସଂଖ୍ୟା ୩୬ରେ ପହଞ୍ଚିଛି । ଯାହାକୁ ନେଇ ଚିନ୍ତାରେ ପଡିଯାଇଛନ୍ତି ବୁଦ୍ଧିଜୀବୀ । ଫଳରେ ସରକାରଙ୍କ ପକ୍ଷରୁ କଟକଣା କୋହଳ ପରେ ଏବେ ନିଜ ସୁରକ୍ଷା ନିଜ ହାତରେ ବୋଲି ସ୍ଥାନୀୟ ଲୋକ ଓ ବୁଦ୍ଧିଜୀବୀ ପ୍ରକାଶ କରିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
