ଢେଙ୍କାନାଳ: ବିଜେଡି ନେତାଙ୍କ ଗାଡି ଉପରକୁ ବୋମା ମାଡ । ଢେଙ୍କାନାଳ ଜିଲ୍ଲା ପୂର୍ବତନ ଯୁବ ବିଜେଡି ଉପସଭାପତି କାହ୍ନୁ ସାହୁଙ୍କ ଗାଡି ଉପରକୁ ବୋମା ମାଡ କଲେ ଦୁର୍ବୃତ୍ତ । ସୋମବାର ବିଳମ୍ବିତ ରାତିରେ ବୋମାମାଡ ହୋଇଥିବା ସୂଚନା । ଏକ ବାଇକରେ ଆସି କାମାକ୍ଷାନଗର ୨ ନଂ ଓ୍ବାର୍ଡ ମଢ଼ିସାହିରେ ଥିବା ବାସଭବନ ଠାରେ ଦୁର୍ବୃତ୍ତ ମାନେ ବୋମା ମାଡ କରିଥିବା ସୂଚନା । ସିସିଟିଭିରେ କଏଦ ହେଲା ବୋମା ମାଡ ସମୟର ଭିଡିଓ ।
ମିଳିଥିବା ସୂଚନା ଅନୁଯାୟୀ, ସୋମବାର ବିଳମ୍ବିତ ରାତି ପ୍ରାୟ ୧ଟା ୪ମିନିଟ ସମୟରେ ଦୁଇ ଜଣ ଦୁର୍ବୃତ୍ତ ବାଇକରେ ଆସି କାମାକ୍ଷାନଗର ମଢ଼ିସାହିରେ କାହ୍ନୁ ସାହୁଙ୍କ ବାସଭବନରେ ତାଙ୍କ କାର ଉପରକୁ ତିନିଟି ବୋମା ଫିଙ୍ଗିଥିଲେ । ଫଳରେ ଗାଡିର ପଛ କାଚ ସମ୍ପୂର୍ଣ୍ଣ ଭାଙ୍ଗି ଯାଇ ଥିବା ବେଳେ, ଘଟଣା ସ୍ଥଳରେ ଏବେବି ଦୁଇଟି ଅଫୁଟା ବୋମା ପଡ଼ିରହିଛି । ଏ ନେଇ ଖବର ପାଇ କାମାକ୍ଷାନାଗର ପୋଲିସ ଘଟଣା ସ୍ଥଳରେ ପହଞ୍ଚି ଅଧିକ ତଦନ୍ତ ଜାରି ରଖିଛି । ତେବେ ଦୁର୍ବୃତ୍ତ ମାନଙ୍କୁ ବର୍ତ୍ତମାନ ସୁଦ୍ଧା ପୋଲିସ ଧରିବାରେ ସଫଳ ହୋଇନଥିବା ବେଳେ ସିସିଟିଭିରେ କଏଦ ହୋଇଛି ବୋମା ମାଡ ସମୟର ଭିଡିଓ । କାହ୍ନୁ ସାହୁ ବିଜୁ ଜନତା ଦଳରେ ଜଣେ ଆଗଧାଡିର ସଦସ୍ୟ ଅଛନ୍ତି। ତେବେ କିଏ ଏବଂ କାହିଁକି ଏଭଳି କାଣ୍ଡ ଭିଆଇଲା ତାହା ପୋଲିସର ତଦନ୍ତ ପରେ ହିଁ ସ୍ପଷ୍ଟ ହେବ । ଏହି ଘଟଣାକୁ ନେଇ କାହା ଉପରରେ ସନ୍ଦେହ ନଥିବା ମଧ୍ୟ କହିଛନ୍ତି କାହ୍ନୁ ।
ଏହା ମଧ୍ୟ ପଢନ୍ତୁ-Cyclone threat: ଅପରାହ୍ନ 4ଟାରେ ଜରୁରୀକାଳିନ ବୈଠକ ଡାକିଲେ ସରକାର
ଏନେଇ ପୂର୍ବତନ ଯୁବ ବିଜେଡି ଉପସଭାପତି କାହ୍ନୁ ସାହୁ କହିଛନ୍ତି ଯେ, ''କାଲି ରାତି ୧୦ଟାରୁ କମା ସାରି ଫେରିବା ବେଳେ କାରଟିକୁ ବାହାରେ ରଖିଥିଲି । ଏହାପରେ ବିଳମ୍ବିତ ରାତିରେ ପୋଲିସ ତରଫରୁ ମୋତେ ଫୋନ ଆସିଥିଲା । ମୋ ଗାଡି ଉପରେ ବୋମା ମାଡ ହୋଇଥିବା ପୋଲିସ ତରଫରୁ ସୂଚନା ମିଳିଥିଲା । ମୁଁ ଆସି ଦେଖିବା ବେଳେ ଗାଡି କାଚ ଭାଙ୍ଗି ଯାଇଛି । ଦୁଇ ଜଣ କଳା ପଲସରରେ ଆସି ବୋମା ମାଡ କରିଥିଲେ । ଏହି ଘଣ୍ଟାରେ ମୋର କାହା ଉପରେ ସନ୍ଦେହ ନାହିଁ । ତଦନ୍ତ ହେଲେ ଜଣାପଡିବ ବୋଲି କହିଛନ୍ତି କାହ୍ନୁ '' ।
ଇଟିଭି ଭାରତ, ଢେଙ୍କାନାଳ
