ଢେଙ୍କାନାଳ: କୋରୋନା ନେଇ ବାହାଘର ବ୍ରତଘର ଆଦି ସାମାଜିକ ଉତ୍ସବ ଉପରେ କଟକଣା ରହିଛି । ସେପଟେ ଢେଙ୍କାନାଳ ଜିଲ୍ଲାରେ ଏକ ବିବାହରେ ବରଯାତ୍ରୀଙ୍କ ଉନ୍ମତ୍ତ କାଣ୍ଡ ସାମନାକୁ ଆସିଛି । ହୋଟେଲ ଭିତରେ ମଦ ପିଇବାକୁ ମନା କରିବାରୁ ହୋଟେଲରେ ନିଆଁ ଲଗାଇବା ସହ ହୋଟେଲ ମାଲିକଙ୍କୁ ନିର୍ଧୁମ ମାଡ ମାରିଛନ୍ତି ବରଯାତ୍ରୀ ଦଳ ।
ସୂଚନାନୁଯାୟୀ, ବୁଧବାର ରାତ୍ରିରେ ରାସୋଳ ଥାନା ଅନ୍ତର୍ଗତ କୁନୂଆ ଗ୍ରାମରୁ କଦଳିପାଳ ଗ୍ରାମକୁ ବରଯାତ୍ରୀ ଆସିଥିଲେ । ହୋଟେଲରେ ମଦ ପିଇବା ପାଇଁ ଜିଦ କରିବାରୁ ବାରଣ କରିଥିଲେ ହୋଟେଲ ମାଲିକ ବଟକୃଷ୍ଣ। ଫଳରେ ଉତ୍ତେଜିତ ବରଯାତ୍ରୀ ତାଙ୍କୁ ମାରପିଟ କରିଥିବା ବେଳେ ଭୋର ସମୟରେ ଫେରିବା ବେଳେ ନିଆଁ ଲଗାଇ ପଳାଇଥିବା ଜଣାପଡିଛି ।
ତେବେ ନିଆଁ ଲାଗିଥିବା ଖବର ପାଇ ରାସୋଳ ଦମକଳ ବାହିନୀ ଆଜି ଭୋର ସମୟରେ ଆସି ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ । କିନ୍ତୁ ହୋଟେଲଟି ଚାଳଘର ହୋଇଥିବାରୁ ସମୂର୍ଣ୍ଣ ଜଳିଯାଇ ଲକ୍ଷାଧିକ ଟଙ୍କାର ସାମଗ୍ରୀ ପୋଡି ପାଉଁଶ ହୋଇଯାଇଛି । ଏ ସମ୍ପର୍କରେ କଦଳିପାଳ ଗ୍ରାମର ହୋଟେଲ ମାଲିକ ବଟକୃଷ୍ଣ ବେହେରା ରାସୋଳ ଥାନାରେ ଲିଖିତ ଅଭିଯୋଗ କରିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
