ସିଏମସି ପ୍ରକଳ୍ପ ବିରୋଧରେ ନିଆରା ପ୍ରତିବାଦ, ବାସ୍ତୁ ଦୋଷ କାଟିବାକୁ ହୋମଯଜ୍ଞ କଲା ସଂଗଠନ

ନିର୍ମାଣଧୀନ ଶୌଚାଳୟକୁ ଜନ ସାଧାରଣଙ୍କ ପାଇଁ ଖୋଲିବାକୁ ପ୍ରତିବାଦ କରାଯାଇଛି । ହୋମଯଜ୍ଞ କରି ନିଆରା ଢଙ୍ଗରେ ପ୍ରତିବାଦ କରିଛନ୍ତି ସୁବାସ ସଂଗଠନର କର୍ମକର୍ତ୍ତା । ଅଧିକ ପଢ଼ନ୍ତୁ

କଟକ: ନିର୍ମାଣଧୀନ ଶୌଚାଳୟକୁ ଜନ ସାଧାରଣଙ୍କ ପାଇଁ ଖୋଲିବାକୁ ଅଭିନବ ପ୍ରତିବାଦ କରାଯାଇଛି । କଟକ ମାତା ମଠ ନିକଟରେ ସୁବାସ ସଂଗଠନ ପକ୍ଷରୁ ନିଆରା ଢଙ୍ଗରେ ପ୍ରତିବାଦ କରାଯାଇଛି । ପ୍ରତିବାଦ ସ୍ବରୂପ ବାସ୍ତୁପୂଜା ପୂଜା କରିଛି ସୁୁବାସ ସଂଗଠନ । ନିର୍ମାଣ ହେବାର ଅନେକ ମାସ ବିତିଯାଇଛି କିନ୍ତୁ ଏହାକୁ ଖୋଲା ଯାଇନାହିଁ, ଏଥିପାଇଁ ଏହି ପ୍ରତିବାଦ କରାଯାଇଥିବା କହିଛନ୍ତି ସଂଗଠନର କର୍ମକର୍ତ୍ତା ।

ଏହି ପ୍ରତିବାଦରେ ହୋମକୁଣ୍ଡ ସଜା ହୋଇଥିବାବେଳେ ଅଗ୍ନି ମଧ୍ୟ ସଂଯୋଗ ହୋଇଛି । ପାଖରେ ପୂଜକ ବସି ମନ୍ତ୍ର ପଢ଼ିବା ସହ ହୋମ କୁଣ୍ଡରେ ଘିଅ ମଧ୍ୟ ଢ଼ାଳିଛନ୍ତି । ପୂଜକଙ୍କ ସମ୍ମୁଖରେ କର୍ତ୍ତା ବସିଥିବାବେଳେ ସମ୍ପୂର୍ଣ୍ଣ ରୀତିନୀତି ଅନୁଯାୟୀ ପୂଜାର୍ଚ୍ଚନା ଓ ହୋମ ଯଜ୍ଞ ମାଧ୍ୟମରେ ବାସ୍ତୁ ପୂଜା କରାଯାଇଛି। ସୂଚନା ଅନୁସାରେ, କଟକ ମହାନଗର ନିଗମ ପକ୍ଷରୁ ହକି ବିଶ୍ୱକପ୍ ସମୟରେ କଟକ ସହରର ବିଭିନ୍ନ ସ୍ଥାନମାନଙ୍କରେ ସର୍ବ ସାଧାରଣଙ୍କ ପାଇଁ ନିର୍ମାଣ କରାଯାଇଥିଲା ଅନେକ ଗୁଡ଼ିଏ ଶୌଚାଳୟ । ହେଲେ ଏପର୍ଯ୍ୟନ୍ତ ସେଗୁଡ଼ିକ ଖୋଲା ଯାଇପାରିନଥିବାରୁ ଦେଖାଦେଇଛି ଅସନ୍ତୋଷ ।

ତେବେ ଶୌଚାଳୟ ଖୋଲା ଯାଇନଥିବାରୁ ଏହାର ପ୍ରତିବାଦ ସ୍ୱରୂପ ସୁବାସ ସଂଗଠନ ପକ୍ଷରୁ ପୂର୍ବରୁ ଶୌଚାଳୟ ସମ୍ମୁଖରେ ଗାଧୋଇ ନିଆରା ପ୍ରତିବାଦ କରାଯାଇଥିଲା । ହେଲେ ଏହାର ଅନେକ ମାସ ବିତିଯାଇଥିଲେ ମଧ୍ୟ ମହାନଗର ନିଗମ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନଥିଲା । ଯାହା ଫଳରେ ଆଜି କଟକ ମାତା ମଠ ନିକଟରେ ଥିବା ବନ୍ଦ ଶୌଚାଳୟ ସମ୍ମୁଖରେ ସୁବାସ ସଂଗଠନ ପକ୍ଷରୁ ପୁଣି ଥରେ ନିଆରା ଢଙ୍ଗରେ ପ୍ରତିବାଦ କରାଯାଇଛି । ବାସ୍ତୁ ପୂଜା କରି ପ୍ରତିବାଦ କରିଛି ସୁବାସ ସଂଗଠନ । ଏହାସହ ସଂଗଠନର ସଦସ୍ଯମାନେ କଟକ ମେୟର ସୁବାଷ ସିଂଙ୍କ ବିରୋଧରେ ମଧ୍ୟ ବର୍ଷିଛନ୍ତି ।

"ବର୍ତ୍ତମାନ ସମୟରେ ଶୌଚାଳୟ ଗୁଡ଼ିକ ବନ୍ଦ ରହିଥିବାବେଳେ ମଧ୍ୟ କିଭଳି ଭାବରେ କଟକ ମହାନଗର ନିଗମ ସ୍ମାର୍ଟ ଟଏଲେଟ୍ ନିର୍ମାଣ କରିବା ପାଇଁ ଯୋଜନା କରୁଛି?" ବୋଲି ପ୍ରଶ୍ନ କରିଛନ୍ତି ସଂଗଠନର ସଦସ୍ୟ । "ପ୍ରଥମେ କୋଟି କୋଟି ଟଙ୍କାର ବ୍ୟୟରେ ନିର୍ମାଣ କରାଯାଇଥିବା ଏହି ଶୌଚାଳୟ ଗୁଡ଼ିକୁ କାର୍ଯ୍ୟକ୍ଷମ କରାଯାଉ । ତାପରେ ଅନ୍ୟ କଥା ନିଗମ ଚିନ୍ତା କରନ୍ତୁ" କହି ବର୍ଷିଛନ୍ତି ସଂଗଠନର ସଦସ୍ୟ । ଅକାମୀ ହୋଇ ପଡିରହିଥିବା ଶୌଚାଳୟକୁ କାର୍ଯ୍ୟକ୍ଷମ କରିବାକୁ ଦାବି ଜୋର ଧରିଛି ।

ଇଟିଭି ଭାରତ, କଟକ