କଟକ: ପୂର୍ବତନ ମନ୍ତ୍ରୀ ତଥା ରାଉରକେଲା ବିଧାୟକ ଶାରଦା ନାୟକଙ୍କ ବିରୋଧରେ ହାଇକୋର୍ଟରେ ନିର୍ବାଚନୀ ମାମଲା ଦାଏର ହୋଇଛି । ଶାରଦା ନାୟକ ଲାଭଜନକ ସଂସ୍ଥା ସହ ଜଡିତ ଥିବା ଦର୍ଶାଇ ତାଙ୍କ ନିର୍ବାଚନକୁ ଅସିଦ୍ଧ ଘୋଷଣା କରିବାକୁ ମାମଲା ଦାଏର ହୋଇଛି । ବିଜେପିର ପରାଜିତ ପ୍ରାର୍ଥୀ ନିହାର ରଞ୍ଜନ ରାୟ ଏହି ମାମଲା ଦାଏର କରିଛନ୍ତି ।
ଏହାଛଡା ସେ ନିଜର ଅପରାଧିକ ପୃଷ୍ଟଭୂମୀ ଏବଂ ସମ୍ପତ୍ତି ବିଷୟରେ ସମ୍ପୁର୍ଣ୍ଣ ତଥ୍ୟ ସତ୍ୟପାଠରେ ଦେଇନଥିବା ଅଭିଯୋଗ ହୋଇଛି । ଏ ସବୁକୁ ଦୃଷ୍ଟିରେ ରଖି ଶାରଦାଙ୍କ ନିର୍ବାଚନ ଅସିଦ୍ଧ ଘୋଷଣା କରି ତାଙ୍କୁ ବିଜୟୀ ଘୋଷଣା କରିବା ପାଇଁ ନିହାର ନିଜ ଆବେଦନରେ ଦର୍ଶାଇଛନ୍ତି । ସେହିପରି ସାନଖେମୁଣ୍ଡି ବାହୁବଳୀ ବିଧାୟକ ରମେଶ ଜେନାଙ୍କ ବିରୋଧରେ ମଧ୍ୟ ନିର୍ବାଚନୀ ମାମଲା ହାଇକୋର୍ଟରେ ଦାଏର ହୋଇଛି ।
ବିଜେଡିର ପରାଜିତ ପ୍ରାର୍ଥିନୀ ନନ୍ଦିନୀ ଦେବୀ ଏହି ମାମଲା ଦାଏର କରିଛନ୍ତି । ସୁପ୍ରିମକୋର୍ଟ ତଥା ନିର୍ବାଚନ କମିଶନଙ୍କ ନିର୍ଦ୍ଦେଶ ଅନୁଯାୟୀ ଅପରାଧିକ ମାମଲା ବାବଦରେ ଅତି କମରେ ୩ ଥର ଗଣମାଧ୍ୟମରେ ପ୍ରସାରଣ କରିବା ନିୟମ ରହିଛି । ମାତ୍ର ସାନଖେମୁଣ୍ଡି ବିଧାୟକ ଥରେ ମଧ୍ୟ ଗଣମାଧ୍ୟମରେ ଏନେଇ କୌଣସି ପ୍ରସାର କରିନଥିବା ଅଭିଯୋଗ ହୋଇଛି । ଏହା ଭାରତୀୟ ଜନପ୍ରତିନିଧି ଆଇନ୧୯୫୧ର ଉଲଘଂନ ହେଉଥିବା ଦର୍ଶାଇ ନିର୍ବାଚନକୁ ଅସିଦ୍ଧ ଘୋଷଣା କରିବା ପାଇଁ ନନ୍ଦିନୀ ଦେବୀ ଆବେଦନରେ ଉଲ୍ଲେଖ କରିଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
