କଟକ: ଚଳିତବର୍ଷ ସବୁ ପର୍ବ ପର୍ବାଣୀରେ କୋରୋନା ଗ୍ରହଣ ଲାଗି ଥିବାବେଳେ ଦୀପାବଳୀରେ ମଧ୍ୟ ପଡିଛି ଏହାର ପ୍ରଭାବ । ନିରାଡମ୍ବର ଦୀପାବଳୀ ପାଳିବା ସହ ବାଣ ଫୁଟାଇବା ପାଇଁ ଲାଗିଛି କଟକଣା । ଫଳରେ ବାଣ ବ୍ୟବସାୟ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇପଡିଛି । ସେପଟେ ବିଭିନ୍ନ ପ୍ରକାରର ଦୀପ ଓ ଆଲୋକମାଳାରେ ସାଜସଜ୍ଜା କରି ଦୀପାବଳୀ ପାଳିବାକୁ ସ୍ଥିର କରିଛନ୍ତି ଲୋକେ । ଫଳରେ ବାଣ ବ୍ୟବସାୟ କରୁଥିବା ଅଧିକାଂଶ ବ୍ୟବସାୟୀ ପାରମ୍ପରିକ ଦୀପ ସାଙ୍ଗକୁ ଫ୍ୟାନସି ଦୀପ, ଭଳିକି ଭଳି ଲାଇଟ, କାଉଁରିଆ କାଠି ଆଦି ସାମଗ୍ରୀର ପସରା ମେଲାଇ ବସିଛନ୍ତି । ହେଲେ ବାଣ ବ୍ୟବସାୟରେ ଲକ୍ଷାଧିକ ଟଙ୍କା ରୋଜଗାର ହେଉଥିବାବେଳେ କୋରୋନା ଯୋଗୁଁ ମାତ୍ର ୫୦ ପ୍ରତିଶତ ବ୍ୟବସାୟ ହେବା ସମ୍ଭବ ହେଉନଥିବା କହିଛନ୍ତି ବ୍ୟବସାୟୀ ।
ପ୍ରତ୍ୟକ ବର୍ଷ ଏହି ପର୍ବରେ ଘରେ ଘରେ କୁଣିଆ ମାନଙ୍କ ଭିଡ଼ ଜମିଥାଏ। ବଡ ରୋଷେଇ ସାଙ୍ଗକୁ ବେଶ ଧୁମଧାମରେ ଆଲୋକର ପର୍ବକୁ ପାଳନ କରିଥାଆନ୍ତି ସହରବାସୀ। ମାତ୍ର ଚଳିତବର୍ଷ ଦୀପାବଳୀକୁ ନିରାଡ଼ମ୍ବର ଭାବରେ ପାଳନ କରାଯିବ। ପରମ୍ପରା ବଜାୟ ରଖିବା ପାଇଁ ଘରେ ଦୀପ ଓ କାଉଁରିଆ ଜଳାଇ ବଡ଼ବଡିଆଙ୍କୁ ଡାକି ଦୀପାବଳୀ ପାଳିବେ ଲୋକେ । ବାଣ ଫୁଟାଇବା ପାଇଁ ଛୋଟ ଛୋଟ ପିଲାମାନେ ଏଥର ମନ ଉଣା କରିଛନ୍ତି । ତଥାପି ସ୍ଥିତିକୁ ଦେଖି ଏହି ପର୍ବକୁ ପାଳିବାକୁ ଅବିଭାବକମାନେ ପିଲାମାନଙ୍କୁ ବୁଝାଉଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
