କଟକ: କଠିନ ପରିଶ୍ରମ ହିଁ ସଫଳତା ଚାବିକାଠି । ଉଦ୍ୟମ, ଆଗ୍ରହ ଓ ଇଚ୍ଛାଶକ୍ତି ଥିଲେ ଜୀବନର ଲକ୍ଷ୍ୟ ଆପେ ଫିଟିଯାଏ । ସଫଳତାର ପରିସର ମଧ୍ୟରେ ଏବେ ନିଜ ନାଁ କୁ ଯୋଡିଛନ୍ତି କଟକ ଝିଅ ସୁଶ୍ରୀ କର । ଚିତ୍ରକଳାକୁ ନିଜ ଜୀବନରେ ଲକ୍ଷ୍ୟ ସଜେଇ ସେ ପାଇଛନ୍ତି ସ୍ବତନ୍ତ୍ର ପରିଚୟ । ଅନନ୍ୟ କଳାକୃତ୍ତି ଯୋଗୁଁ ସୁଶ୍ରୀ ବେଶ ଚର୍ଚ୍ଚାରେ ରହିଛନ୍ତି । ଖାଲି ସେତିକି ନୁହେଁ, ଚିତ୍ର ପ୍ରତି ଥିବା ଦୁର୍ବଳତାକୁ ସେ ରୋଜଗାର ପନ୍ଥା ଭାବରେ ଆପଣାଇଛନ୍ତି ।
କଟକ ନିବାସୀ ସୁଶ୍ରୀ କର ଗ୍ରାଜୁଏସନ ପାଠ ସାରି ଓପିଏସି ପାଇଁ ପ୍ରସ୍ତୁତ ହେଉଥିଲେ । ମାତ୍ର କୋରୋନା ଯୋଗୁଁ ପାଠ ପଢ଼ାରେ ବାଧା ସୃଷ୍ଟି ହୋଇଥିଲା । ହେଲେ ଏହାରି ଭିତରେ ସେ ଧୈର୍ଯ୍ୟହରା ନହୋଇ ନିଜ ସମୟର ସଦୁପଯୋଗ କରିଥିଲେ। ଘରେ ବସି କିଛି ନୂଆ କରିବାର ସ୍ବପ୍ନ ଦେଖିଲେ । ଆଉ ୟୁଟ୍ୟୁବ ତାଙ୍କୁ ଦେଖାଇଲା ସଫଳତାର ମାର୍ଗ । ଡଟ ମଣ୍ଡଲା ଚିତ୍ରକଳା ପ୍ରତି ଆକର୍ଷିତ ହୋଇଥିଲେ ସୁଶ୍ରୀ । ଏହାକୁ ପାଥେୟ କରି ଚିତ୍ର ଆଙ୍କିବା ଆରମ୍ଭ କରିଥିଲେ । ଶିବ, ହନୁମାନ, ଜଗନ୍ନାଥଙ୍କ ଭଳି ଅନେକ ଭଗବାନଙ୍କ ଡ଼ଟ ମଣ୍ଡଲା ଶୈଳୀରେ ଚିତ୍ର ଆଙ୍କି ସୋସିଆଲ ମିଡିଆରେ ପୋଷ୍ଟ କଲେ । ଲୋକମାନେ ଏହାକୁ ପସନ୍ଦ କରିବା ସହ ଅର୍ଡର କରିବାକୁ ଲାଗିଲେ । ସୁଶ୍ରୀଙ୍କ ଚିତ୍ରକଳାର ଚାହିଦା ଏତେମାତ୍ରାରେ ବଢ଼ିଲା ଯେ, ରାଜ୍ୟ ତଥା ରାଜ୍ୟ ବାହାରୁ ମଧ୍ୟ ଲୋକଙ୍କ ଅର୍ଡର ଆସିଲା । ବର୍ତ୍ତମାନ ନିଜ ହାତ ତିଆରି ଚିତ୍ରକଳାକୁ ବିକ୍ରି କରି ବେଶ ପଇସା ରୋଜଗାର କରିପାରୁଛନ୍ତି ସୁଶ୍ରୀ ଏବଂ ଜଣେ ସଫଳ ଅନଲାଇନ ବ୍ୟବସାୟୀ ଭାବରେ ନିଜର ପରିଚୟ ସୃଷ୍ଟି କରିଛନ୍ତି ।
ପିଲାଟି ଦିନରୁ ସୁଶ୍ରୀଙ୍କର ପାଠପଢ଼ା ସହ ଚିତ୍ର ପ୍ରତି ବେଶ ଦୁର୍ବଳତା ଥିଲା । ତାଙ୍କର ଏଭଳି ସଫଳତା ପାଇଁ ପରିବାର ଲୋକଙ୍କ ସମର୍ଥନ ଥିବା ସହ ଝିଅ ପାଇଁ ଅତ୍ୟନ୍ତ ଗର୍ବ ଅନୁଭବ କରୁଥିବା ମାଆ କହିଛନ୍ତି । ଆଗକୁ ମଧ୍ୟ ତାଙ୍କର ଏହି କାର୍ଯ୍ୟ ଜାରି ରହିବ ବୋଲି ସେ କହିଛନ୍ତି । ଦୀର୍ଘ ଦୁଇ ବର୍ଷ ଧରି ଲୋକଙ୍କ ଜୀବନରେ ଅଭିଶପ୍ତ ପାଲଟିଥିବା ଲକଡାଉନ ସୁଶ୍ରୀଙ୍କ ଜୀବନ ବଦଳାଇଦେଇଛି । ଆଗାମୀ ଦିନରେ ସେ ଜଣେ ବଡ଼ ବ୍ୟବସାୟୀ ହେବେ ବୋଲି ଆଶା ରଖିଛନ୍ତି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
