କଟକ: ପ୍ରବଚନ ଦେବାକୁ ପୁଣି ମନ ବଳାଇଲେଣି ମାନ୍ୟବର । ସଭା ସମିତି କରି ନିଜ ଭକ୍ତଙ୍କୁ ପ୍ରବଚନ ଦେବାକୁ ବ୍ୟଗ୍ର ହେଲେଣି ସନ୍ତୋଷ ରାଉଳ ଓରଫ ତଥା କଥିତ ସାରଥି ବାବା । ଏଥିପାଇଁ ଅନୁମତି ଦେବାକୁ ହାଇକୋର୍ଟରେ ଆବେଦନ କରିଛନ୍ତି ଭଣ୍ଡ ସାରଥି ।
ଜେଲରୁ ମୁକୁଳଇବା ସମୟରେ କୋର୍ଟ ତାଙ୍କ ପାଇଁ କିଛି ସର୍ତ୍ତ ରଖିଥିଲେ । ଯେଉଁଥିରେ ଜେଲରୁ ମୁକୁଳିବା ପରେ ସାରଥି କୌଣସି ସ୍ଥାନରେ ପ୍ରବଚନ ଦେଇପାରିବେ ନାହିଁ ବୋଲି କୁହାଯାଇଥିଲା । ଏହାସହ କେନ୍ଦ୍ରାପଡାର ବାରିମୂଳ ଆଶ୍ରମକୁ ଯିବା ଓ ଭକ୍ତଙ୍କୁ ଏକଜୁଟ କରିବା ଉପରେ ମଧ୍ୟ ହାଇକୋର୍ଟ କଟକଣା ଲଗାଇଥିଲେ ।
ଏପରିକି ସାରଥି ସାକ୍ଷୀଙ୍କୁ ପ୍ରଭାବିତ କରିପାରିବେ ନାହିଁ ବୋଲି କୋର୍ଟ ନିର୍ଦ୍ଦେଶ ଦେଇଥିଲେ । ବିନା ଅନୁମତିରେ ରାଜ୍ୟ ବାହାରକୁ ଯିବା ଉପରେ ମଧ୍ୟ କୋର୍ଟ କଟକଣା ଲଗାଇଛନ୍ତି । ତେଣୁ ହାଇକୋର୍ଟ ଜାମିନ ପ୍ରଦାନ ସମୟରେ ଯେଉଁ ସର୍ତ୍ତ ସବୁ ରଖିଥିଲେ ତାହା ଉପରେ କୋହଳ କରିବାକୁ ଶୁକ୍ରବାର କୋର୍ଟରେ ପ୍ରାର୍ଥନା କରିଛନ୍ତି ସାରଥି ।
ଜେଲରୁ ମୁକୁଳିବା ପରେ ତାଙ୍କର ଆର୍ଥିକ ସଙ୍କଟ ଦେଖାଦେଇଛି । ଖାସକରି ପ୍ରବଚନ ତାଙ୍କର ଏକମାତ୍ର ରୋଜଗାର ପନ୍ଥା ହୋଇଥିବାବେଳେ ଏଥିପାଇଁ ଅନୁମତି ନମିଳିବା କାରଣରୁ ସାରଥିଙ୍କ ଚଳଣିରେ ଆର୍ଥିକ ସମସ୍ୟା ହେଉଛି । ସେହିପରି ତାଙ୍କ ସ୍ବାସ୍ଥ୍ୟ ଅବସ୍ଥା ଠିକ ନଥିବାରୁ ତାଙ୍କୁ କୌଣସି ସମୟରେ ବାହାର ରାଜ୍ୟକୁ ଚିକିତ୍ସା ପାଇଁ ଯିବାକୁ ପଡିପାରେ । ଏସବୁ ପାଇଁ ଆବଶ୍ୟକ ପଡ଼ିଲେ ଅନୁମତି ଦେବାକୁ କୋର୍ଟରେ ପ୍ରାର୍ଥନା କରିଛନ୍ତି ସାରଥି ।
ସୂଚନାଯୋଗ୍ୟ ଜୁଲାଇ 25ରେ ହାଇକୋର୍ଟରୁ ସର୍ତ୍ତମୂଳକ ଜାମିନ ପାଇ ଜେଲରୁ ମୁକୁଳିଥିଲେ ସାରଥି ।
କଟକରୁ ନାରାୟଣ ସାହୁ, ଇଟିଭି ଭାରତ
