କଟକ: ସାଲେପୁର ଜେଏମଏଫସି(JMFC)ଙ୍କ ୨୦୨୧, ଅଗଷ୍ଟ ୨୫ ଓ ନଭେମ୍ବର ୧୮ର ନିର୍ଦ୍ଦେଶ ବିରୋଧରେ ସରକାର ଦାୟର କରିଥିବା ଦୁଇ ରିଭିଜନ୍ ଗ୍ରହଣୀୟ ନୁହେଁ ବୋଲି ସାଲେପୁର ଅତିରିକ୍ତ ଜିଲ୍ଲା ଓ ଦୌରା ଜଜ୍ ଅଦାଲତ ରାୟ ଦେଇଛନ୍ତି । ଏଥିସହିତ ସାଲେପୁର ଜେଏମଏଫସି(JMFC) ଅଦାଲତଙ୍କ ନିର୍ଦ୍ଦେଶ ବିରୋଧରେ ସରକାରଙ୍କ ପକ୍ଷରୁ ଦାୟର ଦୁଇ ରିଭିଜନର ଶୁଣାଣିରେ ଅତିରିକ୍ତ ଦୌରା ଜଜ୍ ଅଦାଲତ ଅନ୍ତ ଘଟାଇଛନ୍ତି ।
ପ୍ରକାଶିତ ରାୟରେ ଉଲ୍ଲେଖ କରାଯାଇଛି ଯେ, କେତେକ ଘଟଣା ସମ୍ପର୍କିତ ନଥିପତ୍ର ସଂଗ୍ରହ ପାଇଁ ତଦନ୍ତକାରୀ ଅଧିକାରୀଙ୍କୁ ଜେଏମଏଫସି(JMFC) ଅଦାଲତ ନିର୍ଦ୍ଦେଶ ଦେଇଥିଲେ । ଏହାଦ୍ବାରା ଜଣେ ପୋଲିସ ଅଧିକାରୀଙ୍କ କିଭଳି ଭାବେ ଅଧିକାର ପ୍ରଭାବିତ ହୋଇଛି ସେନେଇ ହୃଦବୋଧ କରାଇବାରେ ଆବେଦନକାରୀ ବିଫଳ ହୋଇଛନ୍ତି । ତଦନ୍ତକାରୀ ଅଧିକାରୀ ଏହି ମାମଲାରେ ଏକ ପକ୍ଷ ହୋଇ ନଥିବାବେଳେ ରିଭିଜନ ଦାଖଲ କରିଥିଲେ । ତୃତୀୟ ପକ୍ଷ ରିଭିଜନ ଦାଖଲ କରିପାରିବେ, କିନ୍ତୁ ସଂପୃକ୍ତ ପକ୍ଷ ଅଧିକାର ମୌଳକ ଭାବେ ପ୍ରଭାବିତ ହୋଇଛି ବୋଲି ପ୍ରମାଣିତ କରିବାକୁ ପଡିବ ବୋଲି ଅଦାଲତ କହିଛନ୍ତି ।
ଏହି ରିଭିଜନରେ ଏଭଳି କୌଣସି ପ୍ରସଙ୍ଗ ଉଲ୍ଲେଖ କରାଯାଇନାହିଁ । ଫୌଜଦାରୀ କାର୍ଯ୍ୟବିଧି ସଂହିତର ଧାରା ୩୯୭(୨)ରେ ରହିଥିବା ବ୍ୟବସ୍ଥା ଅନୁସାରେ ଏପରି ରିଭିଜନ୍ ଗ୍ରହଣୀୟ ନୁହେଁ ବୋଲି ଅଦାଲତ ମତ ଦେଇଛନ୍ତି । ଯଦି ଜେଏମଏଫସି(JMFC) ଅଦାଲତ ନିର୍ଦ୍ଦେଶ ଦ୍ବାରା ଆବେଦନକାରୀ କ୍ଷୁବ୍ଧ ତେବେ ସେ ଆଇନ ଅନୁସାରେ ଉପଯୁକ୍ତ ଅଦାଲତଙ୍କ ଆଶ୍ରୟ ନେଇ ପାରିବେ ବୋଲି ପ୍ରକାଶିତ ରାୟରେ ଉଲ୍ଲେଖ କରାଯାଇଛି । ଏଥିସହିତ ସାଲେପୁର ଜେଏମଏଫସି ଅଦାଲତଙ୍କ ନିର୍ଦ୍ଦେଶ ଉପରେ ଅନ୍ତରୀଣ ରହିତାଦେଶ ଜାରି ପାଇଁ ଦାୟର ଅନ୍ତରୀଣ ଆବେଦନର ଶୁଣାଣିରେ ମଧ୍ୟ ଅତିରିକ୍ତ ଦୌରା ଅଦାଲତ ଅନ୍ତ ଘଟାଇଛନ୍ତି ।
୨୦୨୧, ଅଗଷ୍ଟ ୨୫ରେ ସାଲେପୁର ଜେଏମଏଫସି(JMFC) ଅଦାଲତ ରମାକାନ୍ତ ବରାଳଙ୍କ ପ୍ରୋଟେଷ୍ଟ ପିଟିସନର ଶୁଣାଣି କରି ଅଧିକ ତଦନ୍ତ କରି ରିପୋର୍ଟ ଦାଖଲ ପାଇଁ ମାହାଙ୍ଗା ଥାନା ଆଇଆଇସି ତଥା ତଦନ୍ତକାରୀ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ । ପୋଲିସ ଅଗଷ୍ଟ ୨୫ ନିର୍ଦ୍ଦେଶ ପାଳନ କରି ନଥିବା ବେଳେ ବାପି ବିଶ୍ବାଳ, ଶରତ ନାୟକ ଓ ପ୍ରାଣ ହରାଇଥିବା ଅନ୍ୟତମ ଅଭିଯୁକ୍ତ ପ୍ରଫୁଲ୍ଲ ବିଶ୍ବାଳଙ୍କ ସମେତ ଅନ୍ୟ ଅଭିଯୁକ୍ତଙ୍କ ମୋବାଇଲ୍ ଫୋନ୍ ତଥ୍ୟ (ସିଡିଆର୍) ସଂଗ୍ରହ କରିବାକୁ ଜେଏମଏଫସି ଅଦାଲତ ନଭେମ୍ବର ୧୮ରେ ତଦନ୍ତକାରୀ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ।
କଟକରୁ ନାରାୟଣ ସାହୁ, ଇଟିଭି ଭାରତ
